काठमाडौं– अबदेखि बैंकका कर्मचारीहरू कार्यालयको परिचप पत्रका आधारमा आवतजावत गर्न सक्ने भएका छन्।
महानगरीय प्रहरी कार्यालय रानीपोखरीका प्रहरी वरिष्ठ उपरीक्षक (एसएसपी) सुशीलकुमार यादवले बैंकका कर्मचारीलाई आवतजावतमा कुनै समस्या नहुने जानकारी दिए।
यसअघि काठमाडौं उपत्यकाका तीन जिल्लाका प्रमुख जिल्ला अधिकारीले अत्यावश्यक सेवाका साथै बैंकका कर्मचारी पनि परिचय पत्रका आधारमा आवतजावत गर्न सक्ने निर्णय गरेका थिए।
तीन प्रमुख जिल्ला अधिकारीको निर्देशनपछि बैंकर्स संघले उपत्यकाभर एक बैंकले आठ शाखा खोल्ने निर्णय गरेको थियो।
तर निर्णय विपरीत आज बिहान कार्यालय हिँडेका धेरै कर्मचारीका मोटरसाइकल तथा गाडी प्रहरीले नियन्त्रणमा लिएको थियो। अहिले नियन्त्रणमा लिइएका बैंकर्सका सवारी साधन छोडिएको एसएसपी यादवले जानकारी दिए।
कर्मचारी कार्यालयसम्म पुग्न नपाएपछि आज तोकिएका शाखा पनि खोल्न नसकिएको बैंकर्स संघका कार्यकारी निर्देशक अनिल शर्माले नेपाल समयलाई जानकारी दिए।
उनले भने, ‘आज सेवा प्रवाह हुन सकेको छैन, भोलिदेखि सेवामा अवरोध नहुने गरी प्रहरी कार्यालयबाट लिखित प्रतिबद्धता पर्खिरहेका छौं।’
प्रकाशित: Aug 20, 2020| 13:38 बिहीबार, भदौ ४, २०७७
