'तपाईंको मास्क खै ?'

भैरहवा- समुदायमा कोरोना संक्रमण बढिरहेका बेला लायन्स क्लब अफ भैरहवा ग्रिन सिटीले भैरहवाका टोलटोलमा तपाईंको मास्क खै ? लेखेका ब्यानर लगाउन थालेको छ।

ग्रिनसिटीले सर्वसाधारणलाई कोरोनाको जोखिमबारे सचेत गराउन यस्तो अभियान चलाएको लायन्स क्लब अफ ३२५ बिटु का स्ट्राटेजिक चिफ नवराज न्यौपानेले बताए।

ग्रिनसिटीका अध्यक्ष शिवनाथ गुप्ताले लकडाउन भए पनि मान्छेहरु साँझबिहान मास्क नलगाई बाटो र चोकतिर हुल बाँधेर हिँडिरहेको भन्दै उनीहरुलाई सचेत गराउन र मास्क लगाउन उत्प्रेरित गर्न ब्यानरिङ गरिएको बताए।

भैरहवाका अञ्चललपुर, बर्मेली टोल, लुम्बिनी रोड, मिलनचोक, मेउडिहवा मेडिकल कलेज, आँखा अस्पताल, देवकोटा चोक, जनकपथ, एअरपोर्ट, बसपार्क, बेलहिया जस्ता भिडभाड हुने ३० ठाउँ छनोट गरेर मास्क खै ? भन्ने ब्यानर टाँसिएको क्लबका तृतिय उपाध्यक्ष मनोज क्षेत्रीले बताए।

लायन्स क्लब अफ भैरहवा ग्रिन सिटी केही दिनअगाडि क्यान्सर पीडित मनोज गिरिलाई ५१ हजार रुपैयाँ सहयोग गर्दै स्थापना भएको हो।

५३ जना सदस्य रहेको उक्त क्लबले कोभिड १९ को न्यूनीकरणमा स्थानीय सरकार, प्रदेश सरकार, जिल्ला संकट व्यवस्थापन समितिसँग सहकार्य गरेर काम गर्ने तयारी गरेको क्लबका प्रथम उपाध्यक्ष गोविन्द प्रसाद गिरिले बताए।