प्रदेश १ मा कोरोना संक्रमण बढी देखिएका स्थानमा आइसोलेसन थप गरिने

विराटनगर– प्रदेश १ मा कोरोना संक्रमण बढी भएका स्थानमा आइसोलेसन केन्द्र थप गरिने भएको छ ।

कोभिड–१९ संक्रमण नियन्त्रणका सम्बन्धमा सामाजिक विकास मन्त्री जीवन घिमिरेको अध्यक्षमा बुधबार साँझ बसेको बैठकले संक्रमण बढी देखिएका स्थानमा तत्काल आइसोलेसन केन्द्र थप गरिने निर्णय गरिएको हो ।

बैठकले आइसोलेसन केन्द्र थप गर्नका लागि तत्काल योजना बनाई कार्यान्वयन गर्ने निर्णय गरेको छ । समूहगत संक्रमण नियन्त्रण गराउनका लागि लकडाउन प्रभावकारी बनाउने, सीमा सुरक्षालाई कडाइका साथ प्रभावकारी बनाइने, संक्रमण जोखिम क्षेत्रमा आवश्यक सुरक्षा सावधानी अपनाउने, होम आइसोलेसन र आइसोलेसन स्थलको व्यवस्थापन प्रोटोकल बमोजिम नियमित गर्ने निर्णय गरिएको छ ।

लक्षण देखिएकालाई उपचारका दायरामा ल्याउने र लक्षण नदेखिएकालाई आइसोलेसन र होम आइसोलेसनमा राख्न प्रवन्ध गरिने बैठकले निर्णय गरेको छ ।

बैठकमा विराटनगर महानगरपालिका प्रमुख भीम पराजुलीले विराटनगरमा २ हजार आईसोलेसन वेड आवश्यक रहेको बताए । संक्रमण बढेसँगै संक्रमित राख्ने ठाउँ नभएको बताए । मोरङका प्रमुख जिल्ला अधिकारी कोषहरि निरौलाले विराटनगर, रंगेली र बुढीगंगालाई केन्द्रित गरी आइसोलेसन थप गर्नुपर्ने बताए ।