धरानमा एक जना कोरोना संक्रमितको मृत्यु, मृतकको संख्या ११८ पुग्यो

काठमाडौं– धरानमा आज (बुधबार) ७१ वर्षीय कोरोना संक्रमित महिलाको उपचारका क्रममा मृत्यु भएको छ।

बीपी कोइराला स्वास्थ्य विज्ञान प्रतिष्ठानमा उपचारत धरान उपमहानगरपालिका–१५ की महिलाको आज बिहान सवा ११ बजे मृत्यु भएको प्रतिष्ठानका प्रवक्ता डा. निदेश सापकोटाले जानकारी दिए।

कोरोना संक्रमित ती महिलामा खोकी लाग्ने, श्वास फेर्न समस्या र ज्वरो आएपछि क्वारेन्टिनाट प्रतिष्ठानमा लगिएको थियो।

मृतक महिला दम र मुटु रोगबाट समेत ग्रसित रहेको बताइएको छ। २४ साउनको बिहान प्रतिष्ठानमा भर्ना गरेर उनको उपचार भइरहेको थियो।

शवको व्यवस्थापन नियमानुसार गर्ने तयारी भइरहेको बीपी कोइराला स्वास्थ्य विज्ञान प्रतिष्ठानले जनाएको छ। यसअघि प्रतिष्ठानमा नै मंगलबार राति ६७ वर्षीय महिलाको मृत्यु भएको थियो।

आज दिउँसोसम्मको तथ्यांकअनुसार नेपालमा ११८ जना कोरोना संक्रमितको मृत्यु भइसकेको छ।