काठमाडौं- राष्ट्रकवि माधवप्रसाद घिमिरेको पार्थिव शरीरमा उपप्रधान तथा रक्षामन्त्री ईश्वर पोखरेलले श्रद्धाञ्जली अर्पण गरेका छन् ।
आज विहान घिमिरेकै निवासमा पुगेर पोखरेलले राष्ट्रिय झण्डा श्रद्धाञ्जली व्यक्त गरेका हुन् ।
घिमिरेलाई श्रद्धाञ्जली व्यक्त गर्न नेपाल प्रज्ञा प्रतिष्ठानका कुलपति गंगाप्रसाद उप्रेतीलगायत दर्जनौ साहित्य अनुरागीहरु उनको घर पुगेका छन् ।
उनको आजै पशुपति आर्यघाटमा राष्ट्रिय सम्मानका साथ अन्त्येष्टि गरिँदै छ । श्रद्धाञ्जली अपर्णको कार्यक्रम सकिए लगतै आर्यघाट लैजाने तयारी भएको पारिवारिक स्रोतले जनाएको छ ।
राष्ट्रकवि घिमिरेको १०१ वर्षको उमेरमा मंगलबार साँझ ५ बजेर ५५ मिनेटमा निधन भएको थियो । श्वासप्रश्वासमा समस्या देखिएपछि घरमै उनलाई अक्सिजन दिएर राखिएको थियो ।
वि सं १९७६ असोज ७ गते लमजुङको पुस्तन गाउँमा जन्मिएका घिमिरेले १४ वर्षको उमेरदेखि साहित्य यात्रा सुरु गरेका थिए । उनलाई २०६० असोज ९ गते तत्कालिन सरकारले राष्ट्रकविको उपाधी दिएको थियो ।
प्रकाशित: Aug 19, 2020| 10:41 बुधबार, भदौ ३, २०७७
