राष्ट्रकविको निधनमा राष्ट्रपति दुःखी

राष्ट्रपति विद्यादेवी भण्डारीले राष्ट्रकवि माधवप्रसाद घिमिरेको निधनको खबरले आफू स्तब्ध भएको बताउँदै उनीप्रति श्रद्धाञ्जलि एवं शोकविह्वल परिवारमा समवेदना व्यक्त गरेकी छन्।

हिजो साँझ ट्वीट गर्दै राष्ट्रपतिले काव्य र कविताका माध्यमबाट राष्ट्र¸ राष्ट्रियता र नेपाली साहित्यको श्रीवृद्धिमा उनले पुर्याएको योगदानलाई सधैँ सम्झिरहने बताएकी छन्।

यसैगरी प्रधानमन्त्री केपी शर्मा ओलीले पनि राष्ट्रकवि घिमिरेको अवसानबाट नेपालले साहित्य र वाङ्मयका एक विशिष्ट साधक गुमाएको बताएका छन्।

उनले पनि हिजो साँझ ट्वीट गर्दै साहित्यमार्फत घिमिरेले मुलुकलाई लगाएको गुण नेपाली जनताले कहिल्यै नभुल्ने जनाएका छन्।

राष्ट्रकविको निधनमा नेपाली कांग्रेसका सभापति शेरबहादुर देउवा, सभामुख अग्नि सापकोटा, बागमती प्रदेशका मुख्यमन्त्री डोरमणि पौडेल, नेकपाका उपाध्यक्ष बामदेव गौतम लगायतले दुःख व्यक्त गरेका छन्।