काठमाडौं- कोरोना भाइरसको संक्रमणबाट थप एक पुरुषको मृत्यु भएको छ ।
काभ्रेको धुलिखेल अस्पतालमा उपचाररत धुलिखेलका एक ९८ वर्षीय वृद्धको उपचारका क्रममा आज (मंगलबार) बिहान मृत्यु भएको हो ।
कोरोनासँग मिल्दोजुल्दो लक्षण देखिएपछि उनी धुलिखेल अस्पताल पुगेका थिए । मधुमेह र दमको रोगी समेत रहेका उनमा साउन २७ गते कोरोना पुष्टि भएको थियो ।
त्यसपछि अस्पताल नै भर्ना भएर उपचार गराउँदै आएका उनको आज बिहान मृत्यु भएको काभ्रेका प्रमुख जिल्ला अधिकारी श्रवण कुमार तिमल्सिनाले जानकारी दिए।
योसँगै नेपालमा कोरोनाबाट ज्यान गुमाउनेको संख्या १ सय ९ पुगेको छ । यसअघि सोमबार राति बाँकेको नेपालगन्जमा एक ६२ वर्षीय पुरुषको मृत्यु भएको थियो ।
प्रकाशित: Aug 18, 2020| 08:54 मंगलबार, भदौ २, २०७७
