इलाम- इलाम सूर्योदय नगरपालिकाको करफोक विद्या मन्दिरमा रहेको क्वारेन्टिनभित्रै एक युवकको मृत्यु भएको छ।
साउन २६ गते भारतको हैदरबादबाट आएर क्वारेन्टिनमा बसेका २२ वर्षका युवकको आइतबार राति मृत्यु भएको हो।
सूर्योदय नगरपालिका वडा नं ९ घर भएका उनको कोरोनाका कारण मृत्यु भएको आशंका गरिएको छ। उनको रिपोर्ट आउन बाँकी छ।
साउन ३० गते उनको स्वाब परीक्षणका लागि पठाइए जिल्ला स्वास्थ्य कार्यालयका कोरोना फोकल पर्सन विमल बरालले जानकारी दिए।
मृतक युवा आइतबार अकस्मात बिरामी भएका थिए। स्वासप्रश्वासमा समस्या देखिएका उनको प्राथमिक स्वास्थ्य चौकीका चिकित्सकले क्वारेन्टिनमै आएर उपचार गरेका थिए।
सामान्य उपचारपछि चिकित्सक फर्किएका थिए भने उनको राति नै मृत्यु भएको हो।
प्रकाशित: Aug 17, 2020| 09:11 सोमबार, भदौ १, २०७७
