काठमाडौँ- लामो समयपछि सत्तारुढ नेपाल कम्युनिस्ट पार्टी (नेकपा)को सचिवालय बैठक आज बस्ने भएको छ ।
बिहान ९ बजे बालुवाटारमा बोलाइएको बैठकमा पेचिलो बन्दै गएको पार्टी भित्रको विवाद समाधानका विषयमा विशेष छलफल हुने प्रवक्ता नारायणकाजी श्रेष्ठले जानकारी दिए । उनका अनुसार अध्यक्षद्वय केपीशर्मा ओली र पुष्पकमल दाहाल प्रचण्डबीच सहमति जुटेसँगै बैठक बस्न लागेको हो ।
बैठकमा नेकपामा जारी विवादको समाधानका लागि शुक्रबार गठन भएको ६ सदस्यीय कार्यदललाई अनुमोदन गर्ने छ ।
पार्टीभित्रको विवाद समाधानको उपाय सुझाउन शुक्रबार ६ सदस्यीय कार्यदल अध्यक्ष केपी शर्मा ओली र पुष्पकमल दाहाल प्रचण्डले गठन गरेका थिए। पौडेल नेतृत्वको कार्यदलमा शंकर पोखरेल, जनार्दन शर्मा, पम्फा भुसाल, भीम रावल र सुरेन्द्र पाण्डे सदस्य छन् ।
उक्त कार्यदलको वैधानिकताप्रति वरिष्ठ नेताहरु झलनाथ खनाल, माधवकुमार नेपाल र प्रवक्ता नारायणकाजी श्रेष्ठले प्रश्न उठाएपछि त्यसलाई सचिवालय बैठकबाट अनुमोदन गराउने तयारी गरिएको हो।
कार्यदलले शनिबारदेखि नै काम थालिसकेको एक नेताले जानकारी दिए ।
प्रकाशित: Aug 17, 2020| 07:14 सोमबार, भदौ १, २०७७
