लगानी बोर्डका सिईओ भट्टलाई काम गर्न बाटो खुल्यो

काठमाडौं- उच्च अदालत पाटनले लगानी बोर्डका प्रमुख कार्यकारी अधिकृत (सिईओ) सुशील भट्टलाई काम गर्न बाटो खोलिदिएको छ।

उच्च अदालत पाटनका मुख्य न्यायाधीश नहकुल सुवेदीको इजलासले यस अघि गरेको अल्पकालिन आदेश आइतबार खारेज गरेपछि भट्टलाई काम गर्ने बाटो खुलेको हो।

अन्तरिम आदेशका लागि आइतबार भएको छलफलमा भट्ट कार्यालयमा हाजिरसमेत भैसकेकाले रिटको अन्तिम टुंगो नलाग्दासम्म काम गर्नबाट रोक्न उपयुक्त नदेखिने निर्णय गरेको छ।

उच्च अदालतका न्यायाधीशहरू ईश्वरराज आचार्य र ठाकुरप्रसाद शर्मा पौडेलको इजलासले दुबै पक्षको बहस सुनेर भट्टलाई कामकाज गर्न बाटो खोलेको अदालतका श्रेस्तेदार बाबुराम दाहालले जानकारी दिए।

इजलासले निवेदनको प्रकृति र विषयको गाम्भिर्यताका आधारमा छिटो टुंग्याउनु पर्ने भएकाले बिपक्षबाट लिखित जवाफ आइपुगेमा सुनुवाईका लागि अग्राधिकार दिन भनिएको छ।

लगानी बोर्डको सिईओमा नियुक्त भट्टको योग्यता नपुग्ने दाबी गर्दै उच्च अदालत पाटनमा अधिवक्ता जयबहादुर भुजेलले रिट हालेका थिए।

रिटमा प्रारम्भिक सुनवाइ गर्दै २७ साउनमा उच्च अदालतले तत्काल कामकाज गर्न रोक लगाएको थियो। उनको नियुक्ति बदर गर्न माग गरिएको रिटमा अन्तरिम आदेश जारी गरेर मुद्दाको अन्तिम टुङ्गो नलागेसम्म कामकाज गर्न रोक लगाउन माग गरिएको थियो।