विराटनगरमा स्वाब संकलन रोकियो

विराटनगर– विराटनगर महानगरपालिकामा कोरोना भाइरस शंकास्पदको परीक्षण गराउन स्वाब संकलनमा खटिँदै आएका एक चिकित्सकमा कोराना संक्रमण पुष्टि भएको छ।

चिकित्सकमा आइतबार कोरोना पुष्टि भएपछि तीव्र रुपमा संक्रमण फैलिरहेको महानगरमा स्वाब संकलन कार्य रोकिएको छ। स्वाब संकलनमा खटिने चिकित्सकमा नै कोरोना देखिएपछि तत्कालका लागि स्वाब संकलन कार्य अघि बढ्न नसकेको महानगरका जनस्वास्थ्य महाशाखा प्रमुख रमेश कार्कीले बताए।

उनका अनुसार संक्रमित चिकित्सकमा ज्वरो आउने लगायत कोरोनासँग मिल्दोजुल्दो लक्षण देखिएपछि स्वाब संकलन गरेर परीक्षण गराइएको थियो।

चिकित्सकमा कोरोना पोजेटिभ देखिएपछि महाशाखाका कर्मचारी क्वारेन्टिनमा बसेका छन्। अन्य स्वास्थ्यकर्मीको कोरोना परीक्षण गराएर रिपोर्ट आएपछि स्वाब संकलनको काम पुनः सुरु गरिने कार्कीले बताए।

विराटनगर महानगरपालिकामा ५२३ जनामा कोरोना संक्रमण पुष्टि भइसकेको छ । मृत्यु हुनेको संख्या ७ पुगेको छ ।