पहिरोबाट विस्थापित ४० परिवारलाई राहत सामग्री प्रदान

काठमाडौं– गृहमन्त्री रामबहादुर थापाले सिन्धुपाल्चोकको जुगल गाउँपालिका–२ लिदीमा पुगेर पहिरो विस्थापित ४० परिवारलाई अत्यावश्यक राहत सामग्री उपलब्ध गराएका छन्।

काठमाडौंबाट तत्काल आवश्यक पर्ने राहत सामग्रीसहित हेलिकप्टर लिएर पुगेका थापाले राहत सामग्री उपलब्ध गराएका हुन्।

उनले तत्काल राहत वितरणका लागि वडाध्यक्ष प्रताप लामालाई २ लाख रुपैयाँसमेत उपलब्ध गराएका छन्। पालसेट, भाँडावर्तन, म्याट्रेस, बाल्टिन, पञ्जा, ग्यालिन, बल्यांकेट लगायतका सामग्री हेलिकप्टरबाट लगिएको थियो।

नेपाली सेनाको हेलिकप्टरमा गृहसचिव महेश्वर न्यौपाने, विपद् प्राधिकरणका सिईओ सहितको टोली लिएर गृहमन्त्री थापा पहिरोस्थल पुगेका थिए। उनले घटनास्थल निरीक्षण गर्दै सुरक्षा निकाय र स्थानीय जनप्रतिनिधिलाई उद्धारमा खटिन निर्देशन दिएका छन्।

आजै बिहान सभामुख अग्निप्रसाद सापकोटासमेत सिन्धुपाल्चोक पुगेका थिए। शुक्रबार बिहान गएको पहिरोमा ३८ जना बेपत्ता भएका छन्। पहिरोले ३७ घर पुरेको छ। अहिलेसम्म ११ जनाको शव भेटिएको छ। अन्यको खोजी जारी छ।