सर्वोच्च अदालतमा भदौ १५ गतेसम्म नियमित मुद्दाको सुनुवाइ नहुने

काठमाडौं– कोरोना संक्रमण बढ्दै गएको भन्दै सर्वोच्च अदालतले भदौ १५ गतेसम्म नियमित मुद्दाको सुनुवाई रोक्ने निर्णय गरेको छ। सर्वोच्च अदालतले शुक्रबार सूचना जारी गर्दै अदालतबाट प्रदान हुँदै आएका सेवामा कटौती गर्ने निर्णय गरिएको जानकारी दिएको हो।

भदौ १५ गतेसम्म बन्दी प्रत्यक्षीकरणको निवेदन दर्ता र सुनुवाई हुने, गम्भीर प्रकृतिका, संवेदनशील, तत्काल सुनुवाई हुनुपर्ने रिटको दर्ता र सुनुवाई मात्रै हुनेछ। त्यस्तै मुद्दा फिर्ता र मिलापत्रका काम मात्रै हुने सर्वोच्चले जारी गरेको सूचनामा भनिएको छ।

सर्वोच्च अदालतको ८ साउनको सूचना बमोजिम काठमाडौं उपत्यकाभित्रका सेवाग्राहीहरुले हदम्याद, म्याद र तारिखमा यस अदालतमा उपस्थित हुनुपर्ने अवस्थाको हकमा सोही बमोजिम हुने गरी सेवा प्रवाहको व्यवस्था मिलाइएको सर्वोच्च अदालतले जनाएको छ।

सर्वोच्च अदालतका न्यायाधीशको सुरक्षामा खटिएका सुरक्षाकर्मीहरुमा पनि कोरोना संक्रमण देखिएको छ। सर्वोच्च अदालतका दुईजना न्यायाधीश ईश्वर खतिवडा र हरि फुयाँल होम क्वारेन्टिनमा बसिरहेका छन्।

खतिवडाका सुरक्षाकर्मीमा कोरोना संक्रमण देखिएपछि उनी होम क्वारेन्टाइनमा बसेका हुन्। खतिवडासँगको इजलासमा रहेको भन्दै न्यायाधीश हरि फुयाँल पनि होम क्वारेन्टाइनमा बसेका छन्।