ओली–दाहाल फेरि छलफलमा

काठमाडौं– सत्तारूढ नेकपाका दुई अध्यक्ष केपी शर्मा ओली र पुष्पकमल दाहालबीच शुक्रबार बालुवाटारमा छलफल सुरु भएको छ।

दुई अध्यक्षबीच केही बेरअघि छलफल सुरु भएको अध्यक्ष दाहालका प्रेस संयोजक विष्णु सापकोटाले जानकारी दिए।

२१ साउनदेखि रोकिएको दुई अध्यक्षबीचको छलफल बिहीबारदेखि पुनः सुरु भएको हो। छलफल समाधान उन्मुख दिशामा अघि बढेको नेताहरुले बताएका छन्।

एक टेलिभिजनमा अन्तर्वार्ता दिँदै प्रधानमन्त्रीसमेत रहेका अध्यक्ष ओलीले ५ दिनभित्रमा नेकपा भित्रको विवाद समाधान हुने बताएका थिए।

त्यसलगत्तै बिहीबारदेखि दुईअध्यक्षबीच छलफल सुरु भएको थियो।

बिहीबारको छलफलपछि अध्यक्ष दाहाल र वरिष्ठ नेता माधवकुमार नेपाल पक्षले काठमाडौंको थापागाउँमा आफू निकट प्रदेश ५ का केन्द्रीय सदस्यहरुसँग छलफल गरेको थियो।

उक्त छलफलमा दाहालले विवाद समाधानका लागि अध्यक्ष ओलीले तीनवटा प्रस्ताव अघि सारेको जानकारी गराएका थिए।

पार्टी र सरकार सञ्चालनको विषयमा भएको कमीकमजोरीको आत्माआलोचना, पाँचै वर्ष ओली प्रधानमन्त्री र कार्यकारी अध्यक्षलाई थप अधिकारसहित पार्टी सञ्चालनको जिम्मेवारीको प्रस्ताव ओलीले राखेको दाहालले आफू निकटका नेताहरुलाई ब्रिफिङमा भनेका थिए।

असार १० गते देखि सुरु भएको पार्टीको स्थायी कमिटीको बैठकमा ओलीले अध्यक्ष र प्रधानमन्त्री दुवै पदबाट राजीनामा दिनुपर्ने माग उठेपछि पार्टीभित्रको विवाद चुलिएको हो।

बिहीबार ओलीले राखेको प्रस्तावमा दाहालले आफू निकटका नेताहरुसँग छलफल गरिसकेपछि ओलीसँग आज भइरहेको भेटवार्तामा जवाफ दिने छन्।

दाहाल–नेपाल पक्ष तीनवटा प्रस्तावमा सहमत भएमा नेकपा भित्रको विवाद समाधान हुने देखिएको छ। तर, ती प्रस्तावको आधिकारी धारणा भने बाहिर आइसकेको छैन।