उपचार नगर्ने निजी अस्पताल, चोट खाने उपचारमा खट्ने डाक्टर

पर्सा- पर्सामा उपचार नपाएर एक बिरामीको मृत्यु भएको घटनापछि स्थानीयहरु उग्र प्रदर्शनमा उत्रिएका छन्।

प्रदर्शनकारीको आक्रोशित भिडले कोरोना संक्रमितको उपचारमा खटेका चिकित्सकको गाडी फुटाइदिएको छ।

शनिबार उपचार नपाएर मृत्यु भएको विरोधमा नारायणी अस्पतालको ओपीडी सेवा खुलाउन अस्पताल पुगेका प्रदर्शनकारीहरुले चिकित्सकको गाडी फुटाइदिएका हुन्।

वीरगंजका आधा दर्जन निजी संस्थाले गेटबाटै फर्काइदिएको र अन्तमा उपचार गर्न अस्पताल बोलाएका डा. उदय नारायण सिंहकै गाडी प्रदर्शनकारीले फुटाइदिएको अस्पताल स्रोतले जानकारी दियो।

समुदायस्तरमा फैलिएको कोरोनाको डरले निजी अस्पतालले उपचार गर्न नमानेपछि यसको जनस्तरमा ठूलो विरोध हुँदैछ।

अस्पताल खुलाउन गएका प्रदर्शनकारीलाई प्रहरीले रोक लगाए पनि चिकित्सककै गाडी फुटाइदिए। आज १६ दिनदेखि जारी निषेधाज्ञाले उपचार नपाएर समान्यखालका विरामीसमेत गम्भीर बिरामी हुन थालेका छन्।