पर्सामा ४४ थुनुवासहित १३५ जना कोरोना संक्रमित थपिए

वीरगन्ज- पर्सामा एकैदिन ४४ थुनुवासहित थप १३५ जनामा कोरोना भाइरस (कोभिड-१९)को संक्रमण देखिएको छ।

वीरगन्जको नारायणी अस्पतालमा गरिएको परीक्षणमा आज १४३ जनामा कोरोना संक्रमण देखिएको हो। अस्पतालका चिकित्सक डा. निरज सिंहका अनुसार आज थपिएका संक्रमितमध्ये पर्साका १३५ जना छन्। यस्तै, बारा तथा रौतहटका चार/चार जना रहेको उनले जानकारी दिए।

पर्साका प्रहरी नायब उपरीक्षक मन्जित कुँवरले कन्ट्याक्ट ट्रेसिङका क्रममा ४४ थुनुवामा कोरोना संक्रमण देखिएको जानकारी दिए। उनका अनुसार संक्रमितहरु वीरगन्ज महानगरपालिकास्थित प्रहरी चौकी, ईनर्वा तथा वडा प्रहरी कार्यालय श्रीपुर र विर्ताका थुनुवा छन्।

एकै वडाका २७ जना

वीरगन्ज महानगरपालिका–२५, खलवाटोल सिर्सियाका २७ जना पुरुषमा कोरोना संक्रमण देखिएको छ।

यसैगरी, वीरगन्ज महानगरपालिका–१०, आदर्शनगर र अशोक बाटिकाका ६ महिलासहित गरी ११ जना, चिनिमेलका दुई महिलासहित चार जना, वीरगन्ज ११ का दुई जनामा कोरोना संक्रमण देखिएको छ।

यसैगरी, वीरगंज महानगरपालिका–१३, तेजारथ टोल, मुर्ली-१२, भिष्वा-१५, घडिअर्वा-१०, पिपरा, गण्डक लगायतका एक/एक जना संक्रमित थपिएका छन्।

बारामा कलैया, चिउटाहा, लिपनिमाल–३ र जितपुरका एक/एक जना संक्रमित थपिएका छन्। रौतहटको ईशनाथ नगरपालिका रौतहटका २ महिलासहित तीन जना र गौर नगरपालिकाका एक जना पुरुषमा संक्रमण देखिएको छ।

पर्सामा संक्रमित थपिँदै गए पनि आइसोलेसन बेड अभाव छ, जसका कारण संक्रमित समस्यामा छन्।