ओली–दाहाल भेटवार्ता स्थगित

काठमाडौं– नेकपा अध्यक्षद्वय केपी शर्मा ओली र पुष्पकमल दाहालसहितका नेताहरुबीच आज हुने भनिएको भेटवार्ता स्थगित भएको छ।

पार्टीमा देखिएको विवाद समाधान गर्न आज साँझ दुई अध्यक्षबीच भेटवार्ता हुने कार्यक्रम थियो।

प्रधानमन्त्री ओलीका प्रेस सल्लाहकार सूर्य थापाले भेटवार्ता स्थगित भएको जानकारी दिए। उनका अनुसार भेटवार्ता भोलि बिहीबार बिहानका लागि सारिएको छ।

आइतबारदेखि दुई अध्यक्ष, वरिष्ठ नेता झलनाथ खनाल, नेकपा संसदीय दलका उपनेता सुबास नेम्बाङबीच निरन्तर छलफल भइरहेको छ।

नेताहरुबीच पटक–पटक छलफल भए पनि निकास निस्कन सकेको छैन।

आजै अध्यक्ष दाहाल, वरिष्ठ नेता झलनाथ खनाल, माधवकुमार नेपालसहितका नेताहरुले राजधानीमा सीमित पत्रकार डाकेर ओलीले एकलौटी पार्टी चलाउन खोजेको आरोप लगाएका थिए।

असार १० गते सुरु भएको नेकपा स्थायी कमिटी बैठक साउन १३ गतेदेखि अनिश्चित छ।