पर्सामा चार सुरक्षाकर्मीसहित थप ७० जनामा कोरोना संक्रमण

पर्सा- पर्सामा साेमबार बिहान थप ७० जनामा कोरोना संक्रमण पुष्टि भएकाे छ। संक्रमितमा चार सुरक्षाकर्मी र १२ महिला छन्।

नारायणी अस्पतालको पीसीआर ल्याबले सोमबार बिहान २ बजे उपलब्ध गराएको विवरणअनुसार संक्रमित सुरक्षाकर्मीमा जिल्ला प्रहरी कार्यालय पर्साका दुई, श्रीपुर वडा प्रहरी कार्यालयमा कार्यरत एक प्रहरी र एक नेपाली सैनिक छन्।

टोलटोलमै गएर परीक्षण गर्न थालेपछि समुदायमा रहेका संक्रमित फेला पर्न थालेको नारायणी अस्पतालका चिकित्सक डा. निरज सिंहले बताए।

नयाँ संक्रमितमध्ये सबैभन्दा धेरै वीरगन्ज महानगरपालिका वडा नम्बर ११ श्रीपुरका ४१ जना छन्। संक्रमितमा १० वर्षीया बालिका र ७७ वर्षसम्मका वृद्ध छन्। श्रीपुरमै आइतबार २७ जना संक्रमित थपिएका थिए।

पछिल्लोपटक संक्रमित हुनेमा वीरगन्ज महानगरपालिका ९ घडिअर्वा र गोश्वरा रोड टोलका सात जना, श्रीपुर १२ का तीन जना, घडिअर्वा १० का दुई जना, सखुवा प्रसौनि गाउँपालिका ४ का दुई जना छन्।

अन्य संक्रमितमाम वीरगन्ज महानगरपालिका भिष्वा, बिर्ता, पानगली, राधेमाइ, गहवा, मुर्ली बगैंचा, सेढवाका एक एक जना छन्। यस्तै ग्रामीण भेगका टिहुकी र भारतको पूर्वी चम्पारण सोतबरियाका एकएक जनामा संक्रमण पुष्टि भएको हो।

वीरगन्जमा यसअघि मुख्य सडकको वडा नम्बर ६ मेनरोड, लोहारपट्टी, वडा नम्बर ८ गहवामा धेरै संक्रमित फेला परेका थिए। दुई दिनयता श्रीपुरमा समेत संक्रमितको संख्या थपिएको छ।

यस्तै इटयाही ५ बाराका दुई जना र महागढीमाई नगरपालिका ७ का एकजनाको पीसीआर पोजेटिभ आएको छ।