बजार बढ्दा नाफा बुक गर्ने विक्रेता बढे, नेप्से १७.५० अंकले ओरालो

सेयर बजार परिसूचक (नेप्से) बुधबार १७.५० अंक घटेर १४३२.४४ अंकमा आएको छ ।

यसदिन बैकिङ समूह २१.५१, कारोबार समूह ७.९४, विकास बैंक ३.८३, जलविद्युत ३.८३, फाइनान्स ७.१६, निर्जिवन जीवन बीमा ५.५४, उत्पादनमूलक २०.९४, लघुवित्त १५.१, जीवन बीमा ७१.६ र अन्य १४.३४ अंकले ओरालो लागेको छ भने होटल १३४.४५ र म्युचुअल फन्ड ०.०७ अंकले उकालो लागेको नेप्सेले जनाएको छ ।

सरकारले लकडाउन अन्त्य गरेसँगै होटलहरु पनि खुल्न सक्ने भएसँगै लगानीकर्ता होटलतर्फ आकर्षित भएको लगानीकर्ताहरुको भनाइ छ ।

बुधबार दिनभर १८३ कम्पनीको एक अर्ब ५३ करोड बराबरको सेयर कारोबार भएको नेप्सेले जनाएको छ । केही दिनयता नेप्से उकालो लागेको थियो ।

उकालो लागेको समयमा नाफा बुक गर्न लगानीकर्ताहरुले आफूसँग भएको सेयर बिक्री गर्दा बजार घटेको हो । बजार घटे पनि कारोबार डेढ अर्बभन्दा माथि भएकोले लगानीकर्ताहरुले चिन्ता लिन नपर्ने लगानीकर्ताहरुको भनाइ छ ।

यसदिन सबैभन्दा बढी ओरियन्टल होटलको सेयर मूल्य १० प्रतिशत बढेर सर्किट ब्रेक लागेको थियो । त्यस्तै तारागाउँ रिजेन्सी होटल र सोल्टी होटलको सेयर मूल्य ९.९५ अंकले उकालो लागेको थियो भने सोल्टी होटलको सेयर मूल्य ९.४९ प्रतिशतले बढेको थियो ।

त्यस्तै बुधबार गुमाउनेहरुमा नेपाल सेवा लघुवित्त रहेको छ । सो लघुवित्तको सेयर मूल्य ८.६१ प्रतिशत घटेकोे नेप्सेले जनाएको छ ।