राहतमा मनलाग्दी : चट्याङले मृत्यु हुनेका परिवारलाई १ लाख, रक्सी खाएर मृत्यु हुनेका परिवारलाई तीन लाख

वीरगन्ज– प्रदेश २ सरकारले खेतमा धान रोप्दै गर्दा चट्याङ लागेर मृत्यु भएका परिवारलाई एक लाख रुपैयाँ दिने घोषणा गरेको छ। रक्सी खाएर मृत्यु भएका परिवारलाई भने तीनतीन लाख दिएको छ।

वर्षासँगै परेको चट्याङले बिहीबार कलैया उपमहानगरपालिका–१२ शीतलपुरकी ३५ वर्षीया आशादेवी महतो, ४५ वर्षीया हलिमा खातुन, फेटा गाउँपालिका–१ की ३० वर्षीया इन्दुदेवी महतो र ४० वर्षीया सुनारपतिदेवी महतोको मृत्यु भएको थियो।

खेतमा धान रोपिरहेका बेला चट्याङ लागेर घटनास्थलमै उनीहरुको ज्यान गएको हो। भौतिक पूर्वाधार तथा यातायातमन्त्री जितेन्द्र सोनलले मृतकका परिवारलाई एक–एक लाख रुपैयाँ दिने घोषणा गरेका छन्।

धनुषाको क्षीरेश्वरनाथ नगरपालिकाको रमदैयामा मृत्यु भएका परिवारलाई गत चैत ३ मा मुख्यमन्त्री लालबाबु राउत आफैं उपस्थित भई ३/३ लाख राहत उपलब्ध गराउने घोषणा गरे।

मृतक परिवारलाई चेक प्रदान गरिसकेको मुख्यमन्त्रीका स्वकीय सचिव दीपक यादवले जानकारी दिए।

महोत्तरीको भंगहा नगरपालिका–७ को मेघनाथ गोरहन्ना र बर्दिवास नगरपालिका–१२ को अहिमान बस्तीका ११ जनाको रक्सी सेवनले मृत्युु भएको थियोे।

त्यहाँ पनि मुख्यमन्त्री राउत पुगेर ३/३ लाख रुपैयाँ दिने घोषणा गरेका थिए। विरोध भएपछि सामाजिक विकासमन्त्री नवलकिसोर साहले एक लाखदेखि बढीमा तीन लाख रुपैयाँसम्म दिएका थिए।

खेतमा काम गरिरहेका बेला मृत्यु हुनेको परिवारलाई एक लाख तर रक्सी खाएर मृत्यु हुनेको परिवारलाई तीन लाख रुपैयाँ क्षतिपूर्ति दिनु न्यायोचित नरहेको भन्दै प्रदेश सरकारको आलोचना भएको छ।