वीरगन्जमा चहलपहल बढ्यो

पर्सा- लकडाउन खुकुलो भएसँगै वीरगन्जको जनजीवन सामान्य बन्न थालेको छ। बिहानैदेखि पसल खुल्न थालेका छन्।

सरकारी एवम् गैरसरकारी कार्यालयमा चहलपहल बढेको छ। यस्तै जिल्ला प्रशासन कार्यालय पर्साले जोरबिजोर प्रणालीअन्तर्गत सवारीसाधन चल्न दिएको छ।

चैत ११ देखि ठप्प उद्योग व्यवसाय सञ्चालन हुन थालेपछि मजदुरसमेत काममा फर्किएका छन् ।

बिहानदेखि साँझसम्म पसल खुल्न थालेको माईस्थानस्थित पाण्डे कपडा पसलका सञ्चालक सन्तोष पाण्डेले बताए।

लकडाउन खुकुलो भएर बजारमा चहलपहल बढे पनि कोरोना भाइरस संक्रमितको संख्यामा भने कमी आएको छैन।

परीक्षण कम भएकाले पहिलाको अनुपातमा संक्रमितको संख्या थोरै देखिएको नारायणी कोभिड १९ का प्रमुख डा. उदयनारायण सिंहले बताए।