एकतासँगै जनता समाजवादी पार्टीभित्रको विवाद छताछुल्ल

जनकपुरधाम– डेढ महिनाको कसरतपछि दुुई अध्यक्ष रहने गरी जनता समाजवादी पार्टी (जसपा) अन्ततः निर्वाचन आयोगमा दर्ता भएको छ ।

तत्कालीन राजपाका अध्यक्षमण्डलका सदस्य महन्थ ठाकुर र समाजवादी पार्टीका अध्यक्ष उपेन्द्र यादवलाई केन्द्रीय कार्यसमितिको अध्यक्ष बनाउँदै आइतबार निर्वाचन आयोगमा दर्ता भएको हो ।

यसअघि समाजवादी पार्टीमा संघीय परिषद् अध्यक्ष रहेका पूर्वप्रधानमन्त्री डा.बाबुराम भट्टराई, राजपाका अध्यक्षमण्डलका सदस्य राजेन्द्र महतो र समाजवादी पार्टीका उपाध्यक्ष अशोक राईलाई वरिष्ठ नेताको पद दिइएको छ ।

पहिलो वरीयतामा ठाकुर, दुईमा डा.भट्टराई, तीनमा यादव, चारमा अशोक राई र पाँचमा महतोलाई राख्ने सहमति थियो । तर, निर्वाचन आयोगमा दल दर्ताको निवेदन दिनुअघि संघीय परिषद्को अध्यक्षबाट डा.भट्टराईको नाम काटेर चौथो वरीयतामा राख्दै वरिष्ठ नेतामात्र दिइयो ।

राजपा र सपा एकता भई जसपा बने लगत्तै पार्टीभित्र विवाद चुलिएको छ । एकतापछि पद विभाजनप्रति नेताहरु असन्तुष्ट बनेका छन् । र, उनीहरुले आफ्नो असन्तुष्टि सामाजिक सञ्जालमार्फत् पोखेका छन् ।

तत्कालीन राजपाका केन्द्रीय सदस्य सुरेन्द्रकुमार झाले अन्तिम दिनको अन्तिम समयमा पार्टी दर्ता हुनुपछाडि नेतृत्वमा रहेको आत्मकेन्द्रित सोच एवं पद लोलुप्ता रहेको टिप्पणी गरेका छन् ।

‘पार्टी नेताहरुले ५२ जनाको कार्यसमिति बनाइ निर्वाचन आयोगमा बुझाइएको सूचीलाई नै मधेश आन्दोलन, लोकतान्त्रिक आन्दोलन तथा जनयुद्धको आधिकारिक उत्तराधिकारीको रुपमा व्याख्या गर्ने भूल नगरुन् । किनभने दुबै पार्टीका करिब दुई दर्जन ख्यातिप्राप्त राष्ट्रियस्तरका नेताहरु तथा एक हजार केन्द्रीय सदस्य यसमा समाविष्ट छैनन्,’ झाले बताएका छन् ।

सामाजिक सञ्जाल फेसबुकमार्फत् असन्तुष्टि व्यक्त गर्दै झाले लेखेका छन्, ‘राजपा पार्टीभित्र पुराना पार्टीका कोटा पद्धतीबाट छनौटमा परेकाहरु छन् । मण्डले, झोले, खबरीलाल, नातेदार, मालदार, भ्रष्टाचारी एवं कमिसनखोरहरु उल्लेख्य संख्यामा छन् ।’

जातीय ‘माइजन’ र नेतामा भिन्नता हुन्छ भन्ने कुराको बोध मधेश केन्द्रित नेतृत्वमा नदेखिएको उनको भनाइ छ । ‘पहिलो सूचीमा नाम पर्यो भनेर नमात्तिन मित्रहरुलाई अनुरोध छ,’ उनले लेखेका छन्, ‘छनौटे र चुनौटेमा भिन्नता हुन्छ । महाधिवेशनमा प्रतिस्पर्धा गरेर आउँदा चित्त बुझाउने ठाउँ रहन्छ । तर, छनौटमै मखलेल हुनेहरुबाट संगठन निर्माण र संघर्ष हुनेमा शंका देखिन्छ ।’

पुरानो रक्सी नयाँ बोतलमा राख्दैमा वैकल्पिक शक्ति निर्माण हुन नसक्ने उनले बताएका छन् ।

तत्कालीन राजपाका सहमहासचिव रामप्रवेश बैठाले पनि पार्टी एकीकरण र पद समायोजनप्रति असन्तुष्टि पोखेका छन् । एकीकृत पार्टीमा दलित समुदायलाई ठाउँ नदिइएको भन्दै बैठाले असन्तुष्टि पोखेका हुन् । ‘देशको वैकल्पिक राजनीतिक शक्ति निर्माण गर्ने भनिएको मधेश आधारित पार्टीमा मधेशी दलित समुदाय नअटाउनु दुर्भाग्यपूर्ण छ,’ सामाजिक सञ्जाल फेसबुकमा बैठाले लेखेका छन् ।

‘पार्टीभित्र दलित समुदायको ठाउँ कहाँ छ त ?’ बैठाले प्रश्न गरेका छन् । ‘राजपा नेपालको तर्फबाट एकजना पनि दलित समुदायबाट नआउनु बिडम्बना छ । प्रदेशसभादेखि प्रदेश सरकार तथा पार्टी पोर्टफोलियोमा पनि दलित समुदाय नेतृत्व पंक्तिमा नअटाउनु खेदजनक हो,’ उनले भनेका छन् ।

पार्टी नेताहरुले समानुपातिकको कुरा गर्नु ओठे आवाजबाहेक अरु केही नरहेको उनको भनाइ छ । अझै पनि दलित समुदायका नेता कार्यकर्ता पार्टीभित्र बस्नु भनेको अपमान सहेर बस्नुको विकल्प नरहेको बैठाले बताएका छन् ।