प्रदेश २ मा कोरोना संक्रमितको संख्या १,१४९ पुग्यो, १० हजारभन्दा बढीको रिपोर्ट आउन बाँकी

प्रदेश २ मा ८३ जना कोरोनाका नयाँ संक्रमित थपिएका छन् । आइतबार ८३ जना नयाँ संक्रमित थपिएसँगै प्रदेश २ मा कोरोना संक्रमितको संख्या १ हजार १४९ पुगेको छ ।

सामाजिक विकास मन्त्रालयले जनाएअनुसार आइतबार प्रदेश २ को सिरहामा २, धनुषामा १, महोत्तरीमा ५, सर्लाहीमा ७४ र रौतहटमा एकजना कोरोनाका नयाँ संक्रमित थपिएका छन् ।

सिरहाको भगवानपुर क्वारेन्टिनमा रहेका पाँचजना, धनुषाको जनकपुरधाम उपमहानगरपालिका–१२ बस्ने ३१ वर्षीय पुरुष र महोत्तरीको जलेश्वर र बर्दिवास क्वारेन्टिन गरी पाँचजनामा संक्रमण पुष्टि भएको मन्त्रालयले जनाएको छ ।

यसैगरी सर्लाहीको गोरैता नगरपालिकास्थित क्वारेन्टिनका ६१ र विष्णुपुर गाउँपालिकाका १३ र रौतहटको गरुडा नगरपालिका–८ बस्ने एक पुरुषमा संक्रमण पुष्टि भएको मन्त्रालयले जनाएको छ ।

कुन जिल्लामा कति संक्रमित ?

प्रदेश २ मा कोरोना संक्रमितको संख्या बढ्दै गएको छ । सामाजिक विकास मन्त्रालयले सार्वजनिक गरेको तथ्यांकअनुसार प्रदेश २ को रौतहटमा सबैभन्दा बढी कोरोना संक्रमित पुष्टि भएको छ ।

रौतहटमा हालसम्म ३९७ जनामा संक्रमण पुष्टि भएको छ । यसैगरी सप्तरीमा ७६, सिरहामा ४९, धनुषामा १०१, महोत्तरीमा ९३, सर्लाहीमा २५०, बारामा ७० र पर्सामा १११ जनामा संक्रमण पुष्टि भएको मन्त्रालयले जनाएको छ ।

यसैगरी स्वाब संकलन भइसकेका १० हजार ३५७ जनाको नतिजा आउन बाँकी रहेको मन्त्रालयले जनाएको छ । कोरोना संक्रमण भएर उपचारपश्चात २०३ जना निको भएर घर फर्किसकेको मन्त्रालयले बताएको छ ।