प्रदेश २ मा कोरोना संक्रमितको संख्या एक हजार नाघ्यो, धनुषाका दुई स्वास्थ्यकर्मीमा संक्रमण

प्रदेश २ मा कोरोना संक्रमितको संख्या एक हजार नाघेको छ । शनिबार ८३ जना थपिएसँगै प्रदेश २ मा कोरोना संक्रमितको संख्या एक हजारभन्दा बढी भएको हो ।

८३ जना थपिएसँगै प्रदेश २ मा कोरोना संक्रमितको संख्या १ हजार ६६ पुगेको छ । शनिबार सबैभन्दा बढी महोत्तरीमा ३५ जनामा संक्रमण पुष्टि भएको सामाजिक विकास मन्त्रालयले जनाएको छ ।

धनुषामा ८ जनामा संक्रमण पुष्टि भएकामध्ये एकजना प्रहरीसमेत रहेको बताइएको छ । जनकपुरधाम उपमहानगरपालिका–२० देवपुरा रुपैठास्थित क्वारेन्टिनमा खटिएका एकजना  प्रहरीमा समेत कोरोना पुष्टि भएको छ । संक्रमित प्रहरी क्वारेन्टिन अनुगमनमा आउनेजाने गरेको बताइएको छ ।

यसैगरी सोही क्वारेन्टिनमा खटिएका दुईजना स्वास्थ्यकर्मीमा समेत संक्रमण पुष्टि भएको छ । ५/६ दिनअघि क्वारेन्टिनमा खटिएका दुबै स्वास्थ्यकर्मीमा संक्रमण पुष्टि भएको हो ।
यता, महोत्तरी जिल्लामा जलेश्वर क्वारेण्टाइनका १७ जना पुरुष, मटिहानी क्वारेण्टाइनका ७ जना पुरुष, एकडारा क्वारेण्टाइनका ६ जना पुरुष, गौशाला क्वारेन्टाइनका २ जना पुरुष तथा सोही क्वारेन्टाईनका १ जना महिलामा कोरोना संक्रमणको पुष्टि भएको छ ।

उनीहरु मध्ये गौशला क्वारेन्टाइनका २२ बर्षिय १ जना महिला संक्रमण पुष्टि भएको छ भने अन्य क्वारेन्टाईनमा ११ देखी ४४ बर्ष उमेर समुहका ३४ जना पुरुषहरु संक्रमण देखिएको मन्त्रालयले जनाएको छ ।

राष्ट्रिय प्रयोगशाला टेकु काठमाण्डांैबाट प्राप्त विवरण अनुसार सर्लाही जिल्लामा रामनगर गाउँपालिकाका १६ जना, मलंगवा नगरपालिकाका ८ जना र ईश्वरपुर नगरपालिकाका ३ जना पुरुषहरुमा कोरोना संक्रमणको पुष्टि भएको छ । उनीहरु १६ देखि ३६ बर्ष उमेर समुहका रहेको बुझिएको छ ।

रौतहट जिल्ला ईशनाथ नगरपालिकामा सञ्चालित क्वारेन्टाईनमा रहेको ४ जना पुरुष र २ जना महिलामा समेत कोरोना संक्रमणको पुष्टि भएको छ ।

प्रदेश २ मा हालसम्म १ सय ५९ जना कोरोना संक्रमित ब्यक्तिहरु उपचार पश्चात निको भएर घर फर्किएको सामाजिक विकास मन्त्रालयले जनाएको छ ।