व्यवसायी कुट्ने प्रहरीलाई कारबाही गर्न माग

जनकपुरधाम- व्यवसायीमाथि कुटपिट गर्ने प्रहरीलाई कारबाही गर्न माग गएिको छ। जनकपुर चेम्बर्स अफ कमर्सले व्यवसायी कुटपिट गर्ने प्रहरीलाई कारबाहीको माग गरेको हो।

कमर्सले प्रदेश प्रहरी प्रमुख डीआईजी धीरजप्रताप सिंहलाई ज्ञापनपत्र बुझाउँदै कुटपिट गर्ने प्रहरीलाई कारबाही गर्न तीन दिनको अल्टिमेटम दिएको छ।

कमर्सका अध्यक्ष विजय साहसहितका पदाधिकारीले डीआईजी सिंहलाई ज्ञापनपत्र बुझाएर व्यवसायी कुटपिट गर्ने प्रहरीलाई कारबाहीको माग गरेका हुन्।

ज्ञापनपत्र बुझ्दै प्रदेश प्रहरी प्रमुख डीआईजी सिंहले दोषी प्रहरीलाई कारबाही गर्ने प्रतिबद्धता जनाएको कमर्सका वरिष्ठ उपाध्यक्ष सरोज मिश्रले जानकारी दिए।

जनकपुरको जानकी चोकमा गिफ्ट पसल सञ्चालन गर्दै आइरहेका व्यवसायी श्याम चौधरीमाथि प्रहरीले बिहीबार निर्घात कुटपिट गरेर दुर्व्यवहार गरेको थियो।

लकडाउनका कारण लामो समयदेखि बन्द रहेको पसल सरसफाइ गरिरहेका बेला त्यहाँ पुगेको प्रहरी टोलीले चौधरीलाई नियन्त्रणमा लिएर कुटपिट गरेको थियो। प्रहरीको कुटपिटबाट चौधरीको शरीरमा ननीलडाम भएको छ।

प्रहरीले बिनाकारण व्यवसायी चौधरीका साथै बाटो हिंड्ने सर्वसाधारणलाई समेत कुटपिट गरेको भन्दै प्रहरीको आलोचना भइरहेको छ।