एकैदिनमा अहिलेसम्मकै उच्च संख्यामा कोरोना संक्रमित थपिए, कुन देशमा कतिको मृत्यु ?

काठमाडौं- विश्वव्यापी महामारीको रुपमा फैलिएको कोरोना भाइरसबाट एकै दिनमा संक्रमित हुनेको संख्या अहिलेसम्मकै उच्च विन्दुमा पुगेको छ ।

बिहीबार एकै दिनमा १ लाख २५ हजार ९ सय ८३ जना कोरोनाबाट संक्रमित भएका छन् । यसअघि जेठ १६ गते १ लाख २५ हजार ५ सय ११ जनामा संक्रमण पुष्टि भएको थियो । उक्त रेकर्ड तोड्दै बिहीबार एकै दिनमा यति ठूलो संख्यामा संक्रमित थपिएका हुन् ।

यस्तै पछिल्लो २४ घण्टामा कोरोनाबाट ५ हजार ३ सय ३६ जनाको मृत्यु भएको छ । बुधबार ४ हजार ९ सय २८, मंगलबार ४ हजार ६ सय ६९, सोमबार ३ हजार ५३ व्यक्तिको मृत्यु भएको थियो ।

जोन हपकिन्स विश्वविद्यालयका अनुसार कोरोनाबाट अहिलेसम्म ६५ लाख ९५ हजार ३ सय ९१ व्यक्ति संक्रमित भएका छन् भने ३ लाख ८८ हजार ७ सय १० व्यक्तिको मृत्यु भएको छ ।

सबैभन्दा बढि संक्रमित र मृतक अमेरिकामा छन् । जहाँ १८ लाख ७२ हजार २ सय २१ ब्यक्तिमा संक्रमण पुष्टि भएको छ भने १ लाख ८ हजार १ सय २० जनाको मृत्यु भएको छ ।

ब्राजिलमा ५ लाख ८४ हजार १६ जना संक्रमित भएका छन् भने ३२ हजार ५ सय ४८ जनाको मृत्यु भएको छ । रुसमा ४ लाख ४० हजार ५ सय ३८ जना संक्रमित भएका छन् भने ५ हजार ३ सय ७६ जनाको मृत्यु भएको छ ।

बेलायतमा २ लाख ८३ हजार ७९ जनामा संक्रमण पुष्टि भएको छ भने ३९ हजार ९ सय ८७ जनाको मृत्यु भएको छ । स्पेनमा २ लाख ४० हजार ६ सय ६० जना संक्रमित भएका छन् भने २७ हजार १ सय ३३ जनाको मृत्यु भएको छ ।

यस्तै इटालीमा २ लाख ३४ हजार १३ जना संक्रमित हुँदा ३३ हजार ६ सय ८९ जनाको मृत्यु भएको छ । फ्रान्समा १ लाख ८९ हजार ५ सय ६९ जनामा संक्रमण पुष्टि भएको छ भने २९ हजार ६८ जनाको मृत्यु भएको छ।

छिमेकी मुलुक भारतमा २ लाख २६ हजार ७ सय १३ जना संक्रमित भएका छन् भने ६ हजार ३ सय ६३ जनाको मृत्यु भएको छ । नेपालमा भने हालसम्म २ हजार ६ सय ३४ जनामा संक्रमण पुष्टि भएको छ भने १० जनाको मृत्यु भएको छ ।