पूर्वराज्यमन्त्री यादवको नेतृत्वमा सीमा क्षेत्रमा खाना खुवाउने अभियान

लकडाउनका कारण भारतबाट नेपाल आइरहेका नेपाली र नेपालबाट भारततर्फ जाने बाटो कुरेर सीमा क्षेत्रमा बसेका भारतीयलाई विभिन्न व्यक्ति तथा संघसंस्थाले खाना–नास्ताको व्यवस्था गरिरहेका छन् ।

पूर्व कृषि तथा सहकारी राज्यमन्त्री ओमप्रकाश यादव (गुल्जारी)ले बुधबारदेखि सीमामा रोकिएकाहरुलाई पेटभर खाना खुवाउने अभियान शुरु गरेका छन् ।

नेकपाका नेता समेत रहेका गुलजारीले नेपालबाट भारततर्फ जाने भारतीय र भारतबाट नेपाल तर्फ आउने नेपालीहरुलाई खाना खुवाउन थालेका हुन् ।

उनले भने, ‘हामी सीमा क्षेत्रका नागरिकहरुले सीमामा कोहि पनि समस्यामा नपरुन् भनेर यो अभियान चलाएका हौं । नागरिक भारतीय, नेपाली वा अन्य जुनसुकै देशको भएता पनि हामी जति जना भएपनि पेटभर निःशुल्क खाना खुवाउँछौं । हामी सस्तो लोकप्रियताको लागि एक–दुई दिन गरेर छाड्ने होइन । लकडाउनको अवधिभर यो अभियान चलाउछौं ।’

बुधबारमात्रै एक हजारभन्दा बढीलाई खाना खुवाइएको नेकपा सिद्धार्थनगर अध्यक्ष चोपलाल आचार्यले बताए । बुधबारदेखि बेलहियामा सांझ बिहान दाल, भात, तरकारी पकाउने काम शुरु गरिएको छ । उक्त कार्यमा सिनपा १ स्थित नेकपा वडा कमिटी, नगर कमिटी, जिल्ला तहका पदाधिकारी तथा सदस्यहरु र बेलहिया स्थित स्थानीय सहयोगी एवं स्वयंसेवक जुटेको नेकपा नेता धर्मराज गिरीले बताए ।

यसअघि सीमामा रोकिएकाहरुलाई प्रदेश सभा सदस्य सन्तोष पाण्डेले खाना खुवाएका थिए । अहिले उनको अभियान बन्द छ ।

यसैगरी मारवाडी युवा मञ्चका अध्यक्ष मनोज अग्रवालको समूहले नास्ताको व्यवस्थापन गरिरहेको छ ।

यसैगरी मायादेवी च्यारिटेबल फाउन्डेसनले पनि सीमामा केही दिन खाना खुवाएको थियो । नेपाल भारत भन्सार एजेन्ट संघ र बुद्धपथको महिला समूहले पनि नास्ता खुवाउन थालेको लुम्बिनी खुकुरी क्लबका अध्यक्ष रामबहादुर बस्नेतले बताए ।