कांग्रेस उपसभापति निधिले दिए पीपीईलगायतका स्वास्थ्य सामग्री

जनकपुरधाम– नेपाली कांग्रेसका उपसभापति विमलेन्द्र निधिले धनुषाका क्वारेन्टाइनमा पीपीईलगायतका स्वास्थ्य सामग्रीहरु सहयोग गरेका छन्। उपसभापति निधिले धनुषा निर्वाचन क्षेत्र नम्बर ३ स्थित क्वारेन्टाइनहरुमा पीपीई, मास्क, पञ्जालगायतका स्वास्थ्य सामग्री सहयोग गरेका हुन्।

क्वारेन्टाइनमा खटिएका सुरक्षाकर्मी तथा स्वास्थ्यकर्मीहरुको स्वास्थ्यलाई ध्यानमा राख्दै निधिले गरेको स्वास्थ्य सामग्री सहयोग तरुण दल धनुषाले मंगलबार वितरण गरेको छ।

जनकपुरधामको गोपाल धर्मशाला, नगराईन नगरपालिकाको गंगुली, धनौजी गाउँपालिका, नगराईन नगरपालिकाको वडा नम्बर २, र ७, जटही सीमा प्रहरी चौकी र मुखियापट्टी मुसहरनिया गाउँपालिकाको चारवटा क्वारेन्टाइनमा पीपीईलगायतका स्वास्थ्य सामग्री वितरण गरिएको तरुण दल धनुषाका सभापति संजय कर्णले जानकारी दिए।

कोरोना संक्रमितको संख्या बढिरहेकाबेला क्वारेन्टाइनमा खटिएका सुरक्षाकर्मीसमेत संक्रमित हुनथालेपछि स्वास्थ्य सामग्री वितरण गरिएको तरुण दल धनुषाका उपसभापति राकेश विक्रम साहले बताए।

विभिन्न क्वारेन्टाइनहरुमा ६० थान पीपीई, १० थान थर्मल गन, ६० थान एन–९५ मास्क, ६ सय थान पञ्जा वितरण गरिएको साहले जानकारी दिए। सामाग्री वितरण गर्न तरुण दलका सभापति कर्ण, उपसभापति साहसहित सदस्यहरु ज्ञानेन्द्र कर्ण, सुभाष झा, राहुल मिश्र क्वारेन्टाइनमा पुगेका थिए।