सोती घटना : नवराजका बाबु भन्छन्- दलित भएकै कारण मेरो छोराको हत्या गरियो

जाजरकाेट- पश्चिम रुकुमको चौरजहारीस्थित सोतीमा मारिएका नवराज विकका पिता मुनलाल विकले घटनाको निष्पक्ष अनुसन्धान र छानबिन हुनुपर्ने, घटनालाई तोडमोड गरी अपराधीलाई उम्काउन नहुने, सुरक्षाको ग्यारेन्टी गर्नुपर्नेलगायत माग राखेका छन्।

घटनाको स्थलगत अध्ययनका लागि जाजरकोट पुगको राष्ट्रिय मानवअधिकार आयोगको टोलीसँग उनले यस्तो माग गरेका हुन्।
'दलित भएकै कारण मेरो छोराको हत्या गरिएको हो', नवराजका बुवा मुनलाल विकले भने, 'हत्यारालाई कारबाही भएको देख्न पाऊँ, घटनाको सत्यतथ्य छानबिन होस्, अपराधी उम्किन नपाऊन्।'

राष्ट्रिय मानवअधिकार आयोग क्षेत्रीय कार्यालय नेपालगन्जका उपनिर्देशक चन्द्रकान्त चापागाईंको नेतृत्वमा आएको टोलीले घटनाका सम्बन्धमा स्थानीय प्रशासन, प्रहरी, पीडित परिवार र सरोकार पक्षसँग भेटघाट गरेको छ।

टोलीले घटनामा परी ज्यान गुमाएका नवराज विकका आमाबुवा, सञ्जीव विकका परिवार र गणेश बुढाका परिवारलाई भेटेर जानकारी लिएको हो।

स्थलगत अध्ययन टोलीका संयोजक चापागाईंले पीडित परिवारलाई घटनाको सत्यतथ्य छानबिन र अनुसन्धानका लागि आयोगले विशेष निगरानी र पहल गरिरहेको जानकारी दिए।

उनले न्याय पाउनेमा पीडित परिवारलाई आश्वस्त पार्दै भने, 'हामीले घटनापछि हरेक घटनाक्रमलाई सूक्ष्म ढङ्गले नियालिरहेका छौं। यसअघि नै घटनाको सत्यतथ्य छानबिनका लागि सरकारलाई निर्देशनसमेत दिइसकेका छौं। स्थलगत अध्ययनपछि प्राप्त तथ्यलाई समेटेर प्रतिवेदन पनि तयार पार्छौं। सरकारलाई दिन्छौं। हाम्रो खबरदारी निरन्तर जारी रहनेछ।' 

यसअघि पनि आयोगलाई रुकुम र जाजरकोटका अधिकारकर्मी सम्मिलित टोलीले घटनाको स्थलगत अध्ययन गरी प्रारम्भिक प्रतिवेदन बुझाइसकेको छ।