यी हुन् बाँके बस दुर्घटनामा ज्यान गुमाउने १२ जना

काठमाडौं- बाँकेमा आइतबार राति भएको सवारी दुर्घटनामा ज्यान गुमाउने सबै १२ को सनाखत भएको छ। दुर्घटना राप्ती सोनारी गाउँपालिका–२ ठुरिया जंगलमा भएको थियो।

नेपालगञ्जको जमुनाहा नाकाबाट सल्यानतर्फ जाँदै गरेको ना ५ ख ५९९५ नम्बरको फोर्स गाडी अगैयामा रोकिराखेको ट्रकमा ठोक्किएर दुर्घटना हुँदा १२ जनाको ज्यान गएको थियो।

मृत्यु हुनेमा ठेगाना नखुलेका निमबहादुर ओली, रोल्पा थवाङ–३ का देउवीर विक, बुद्धिराम विक, भीमबहादुर विक र नरेन्द्र विक छन्।

यस्तै रोल्पा रुन्चेगढी–६ का मोहनचन्द्र विक, दाङ राजपुर– ६ का रामकुमार पुन, पूर्णबहादुर पुन, सीता पुन छन्। चालक गुराँस गाउँपालिका–४ दैलेखका दानबहादुर खड्का र सहचालक वीरेन्द्रनगर–३ तातापानी सुर्खेतका पवन भण्डारी छन्।

ना ५ ख ५९९५ नम्बरको गाडी रोकिराखेको बा ४ ख ९०६४ नम्बरको ट्रकमा ठोकिएर दुर्घटना भएको थियो।
भारतको रुपैडिया नाका हुँदै नेपाल प्रवेश गरेकालाई लिएर नेपालगञ्जबाट सल्यानतर्फ जाँदै गरेको गाडी करिब १२ बजेतिर दुर्घटनामा परेको प्रहरीले जनाएको छ।

चालक र सहचालक गरी ३२ जना सवार उक्त गाडीमा २० जना घाइते भएका छन्। उनीहरुको नेपालगन्जमा उपचार भइरहेको छ। चार जनाको अवस्था चिन्ताजनक रहेको अस्पतालले जनाएको छ।