कैलालीमा बाढीले बगाएर दुई बेपत्ता

काठमाडौं- कैलालीमा बाढीले बगाएर दुई जना बेपत्ता भएका छन्। चुरे गाउँपालिका–३ स्थित पातली खोलामा सोमबार बिहान आएको बाढीले बगाउँदा दुई जना मजदुर बेपत्ता भएका हुन्।

प्रहरीका अनुसार सहजपुर बोक्टान निर्माणाधीन सडकखण्डमा काम गर्ने कञ्चनपुर, कृष्णपुर नगरपालिका–४, गुलरियाका कमल थापा र सोही ठाउँका २४ वर्षीय गोपाल बिक बेपत्ता भएका छन्।

प्रहरी नायब उपरीक्षक दक्षकुमार बस्नेतले बेपत्ताको खोजी जारी रहेको बताए।

इलाका प्रहरी कार्यालय, फल्टुडेका प्रमुख एवं प्रहरी निरीक्षक माधव विश्वकर्माले रातिदेखि परिरहेको अविरल वर्षा नरोकिँदा खोजीमा समस्या भएको बताए। खोलाको वहाब उच्च भएकाले कठिनाई भइरहेको उनले बताए।

सिराहामा पानीमा डुबेर बालकको मृत्यु

सिराहामा खाल्डोमा जमेको पानीमा डुबेर बालकको ज्यान गएको छ। कर्जन्हा नगरपालिका–४, भुल्केका शम्भु बिकको घरमा बस्दै आएका भान्जा ९ वर्षीय वीरन बिक खाल्डोमा जमेको पानीमा डुबेर मृत्यु भएको हो।

खेतमा ट्याक्टरले माटो खनेको खाल्डोमा जमेको पानीमा डुबेर मृत्यु भएको अवस्थामा उनको शव फेला परेको प्रहरीले जनाएको छ।