दरबार हत्याकाण्डबारे हिमानीको बयान : हामीमाथि पनि बन्दुक तेर्स्याइयो

तत्कालीन राजा वीरेन्द्रको वंश नाश हुने गरी भएको दरबार हत्याकाण्डको रहस्य अझै पनि गर्भमै छ । कहालीलाग्दो हत्याकाण्डको १९ वर्ष बितिसक्दा समेत यसको यथार्थ बाहिर आउन सकेको छैन ।

हत्याकाण्डमा राजा वीरेन्द्र, रानी ऐश्वर्य, युवराज दीपेन्द्र, अधिराजकुमार निराजन, अधिराजकुमारीहरू श्रुति, शान्ति राज्यलक्ष्मी सिंह, शारदा राज्यलक्ष्मी शाह, शाहज्यादी जयन्ती राज्यलक्ष्मी शाह, कुमार खड्गविक्रम शाह र धीरेन्द्र शाहको मृत्यु भएको थियो ।

घटनामा कोमल शाह, शोभा शाही, कुमार गोरखशमशेर र केतकी चेस्टर घाइते भएका थिए । घटना कसले गरायो भन्ने विषय अझै रहस्यमै छ ।

२०५८ जेठ १९ शुक्रबार भएको उक्त घटनाको छानविन गर्न तत्कालिन प्रधानन्यायाधीश केशवप्रसाद उपाध्यायको संयोजकत्वमा एउटा आयोग गठन गरिएको थियो । त्यसपछि यस सम्बन्धमा थप जाँचबुझ र छानविन गर्न सम्म कुनै समिति बनेको छैन । उक्त समितिले राजपरिवारका केही सदस्यहरुसँग बयान लिएको थियो ।

त्यसमध्येकी एक थिइन् पूर्व युवराज्ञी हिमानी शाह । उनले बयानमा आफूमाथि पनि बन्दुक तेर्स्याइएको तर भाग्यले बाँच्न सफल भएको बताएकी छिन् ।

बयान यस्तो थियो–

समितिः त्यो १९ गतेको पारिवारिक जमघटमा सरकारको सवारी भएको भन्ने कुरा आइराखेको छ । लिष्ट प्राप्त गर्‍यौँँ । अब सरकारलाई के कति सम्झना छ ? डिटेलमा पाउन पाएदेखि हामीलाई रिपोर्टको लागि सजिलो पर्छ ।

हिमानीः डिटेलमा त अब के भयो हामीलाई त्यो त थाहा भएन । तर सुरुदेखि नै हामी कार्यक्रममा थियौँ । कार्यक्रममा ८ बजेसम्म सबैजसोको सवारी भैसकेको थियो । ठुलो बुवा सवारी हुँदाखेरी अलि अगाडिको घटना मलाई थाहा छैन ।

तर, ठूलो बुवा सवारी हुनुभन्दा पहिले क्राउन प्रिन्सलाई निराजन सरकार, पारस, राजीव ज्वाँइँ, गोरखले बोकेर खोपीमा सवारी गराइएको थियो । पछि महाराजधिराज सवारी भएको एकै छिनमा ड्याङ्ग आवाज आयो ।

अनि ... अनि त्यसपछि कान्छो बुवा अगाडि सर्नुभयो । कान्छा बुवालाई पनि हानिबक्स्यो अनि कुनातिर यसो साइड परेर लुकेर हामी बसिराखेका थियौँ। अनि त्यसपछि चुप लागेर बस्यौँ ...त्यसपछि फेरी आएर परर पररररर बन्दुक पड्केको सुनेको त्यति नै ।

समितिः यसका, अतिरिक्त जानकारी सरकारलाई छ, छैन ? अनि आफ्नो चाहिँ ?

हिमानीः हामीतिर पनि बन्दुक तेर्स्याइरहनु भएको थियो ।

समितिः सरकारहरु चाहिँ उतापट्टी राज होइबक्सेको होला, बारको उतापट्टि ?

हिमानीः डाइनिङ रुम जाने एउटा डोर छ नि त्यसैको यहाँ पट्टी कर्नरमा त्यसमा हामी थियौँ।

समितिः कहाँनेर ?

हिमानीः यतापट्टी साइडमा म थिएँ ।

समितिः अनि त्यो बगौचाँको कुरा ?

हिमानीः बन्दुकहरु पड्केको मात्र सुनेँ।

(अनि हिमानी रोकिइन्)