जुम्लाका दुई प्रहरीसहित कर्णालीमा थप ४३ जनामा कोरोना

सुर्खेत- पछिल्लो समय कोरोनाको हट स्पट बन्दै गएको कर्णालीमा थप ४३ कोरोनामा संक्रमण पुष्टि भएको छ। जसमध्ये जुम्लाका दुई जना प्रहरीमा पनि संक्रमण देखिएको छ ।

जिल्ला प्रहरी कार्यालय जुम्लामा कार्यरत २७ र ३४ वर्षे प्रहरीमा कोरोना संक्रमण पुष्टि भएको हो । कर्णाली स्वास्थ्य विज्ञान प्रतिष्ठान जुम्लामा गरिएको पीसीआर परीक्षणमा दुई जना प्रहरीसहित ४३ जनामा कोरोना संक्रमण पुष्टि भएको प्रयोगशाला संयोजक विवेककुमार पुनले जानकारी दिए ।

नयाँ संक्रमितमध्ये जुम्लाका १९ र दैलेखका २४ जना रहेका छन् । जुम्लामा हिमा गाउँपालिका वडा नं १, ५, ६ र ७ वडाका ८ जना र सिंजा गाउँपालिका वडा ३, ४ ५, र ६ का ९ जना पुरुष रहेका छन् ।

त्यस्तै दैलेखका २४ जना नयाँ संक्रमितमध्ये नारायण नगरपालिका वडा नं २, ४, ५ र ९ का १७ पुरुष रहेका छन् । दुल्लु नगरपालिका वडा नं ८ र १२ का ७ जना संक्रमित पुष्टि भएका छन् ।

ति मध्ये २ वर्षिया बालक र २ जना महिला रहेका छन् । योसँग दैलेखका कोरोना संक्रमितको संख्या ७२ जना पुग्दा समग्र कर्णालीभर संक्रमित संख्या १ सय ६६ पुगेको छ ।