क्वारेन्टिनमा रहेकी अर्की महिलाले जन्माइन् बच्चा

देलेख- ठाँटीकाँध गाउँपालिका- २ जनता प्राथमिक विद्यालयको क्वारेन्टाइनमा बसेकी महिलाले शुक्रबार राति बच्चा जन्माएकी छन्।

तीन दिनअघि भारतको पौडी गडुवालबाट आएकी २२ वर्षीया मीना बिकले शनिबार राती १० बजे शिशुको जन्म दिएकी हुन्।

मीनाले पहिलो सन्तानका रुपमा छोरीलाई जन्म दिएको वडाअध्यक्ष रुपलाल विश्वकर्माले बताए। तीन वर्षअघि विवाह गरेकी मीना पति मनबहादुर विकसँग रोजगारीको लागि भारत गएकी थिइन्।

जेठ १४ मा उनी ठाँटीकाँध फर्किएकी हुन्। सुत्केरी व्यथा लाग्नासाथ क्वारेन्टाइनमा रहेकी मीनालाई प्राथमिक स्वास्थ्य केन्द्र ठाँटीकाँधमा सुरक्षित सुत्केरी गराउन ल्याउँदा बीच बाटोमै शिशु जन्माइएकी स्वास्थ्य केन्द्रकी इन्चार्ज लक्ष्मी कुमारी रावत (बुढा) ले जानकारी दिइन्।

उनका अनुसार शिशु र आमाको अवस्था ठिक छ। शिशु र सुत्केरी मीनाको स्वास्थ्य राम्रो रहेको र उनीहरुको पिसिआर जाँच्न बाँकी रहेको स्वास्थ्य केन्द्रका इञ्चार्ज लक्ष्मीकुमारी रावत बुढाले जानकारी दिइन्।