अधिवेशनअघि प्रदेश सांसद र कर्मचारीको कोरोना परीक्षण

जनकपुरधाम- प्रदेश २ मा प्रदेशसभाको चौथो अधिवेशन २१ जेठदेखि सुरु हुँदै छ। प्रदेशसभा बैठकपूर्व प्रदेश सांसद, कर्मचारी र सुरक्षाकर्मीहरुको कोरोना परीक्षण सुरु गरिएको छ।

प्रदेशसभाको चौथो अधिवेशन सुरु हुनुपूर्व प्रदेशसभा परिसरमा विहिबारदेखि प्रदेश सांसद, कर्मचारी र सुरक्षाकर्मीहरुको स्वाब संकलन भइरहेको छ।

प्रदेशसभा सचिवालयका निमित्त सचिव रञ्जीत यादवले सभामुख, उपसभामुख, प्रदेश सांसद, कर्मचारी, मर्यादापालक र सुरक्षाकर्मीसहित २ सय ५० जनाको स्वाब संकलन गरिने जानकारी दिए ।

प्रदेशसभाको चौथो अधिवेशन सुरुहुनुपूर्व संकलन गरिएका स्वाबको रिपोर्ट आइसक्ने यादवले बताए। प्रदेश २ को प्रदेशसभामा सभामुखसहित १०७ जना सांसद छन्।

प्रदेश प्रमुख तिलक परियारले संविधानको धारा १८३ को उपधारा १ अनुसार जेठ २१ गते बुधबार दिउँसो १ बजेका लागि प्रदेशसभाको चौथो अधिवेशन आह्वान गरेका छन्। चौथो अधिवेशनमा प्रदेश सरकारले आगामी वर्षको नीति तथा कार्यक्रम र बजेट प्रस्तुत गर्नेछ।