प्रकाशकीय : ‘नेपाल समय’ तेस्रो वर्षमा प्रवेश

नेपाल समय मिडिया आज दुई वर्ष पूरा गरेर तेस्रो वर्षमा प्रवेश गरेको छ।

यस पावन अवसरमा म मिडियाका तर्फबाट हाम्रा पाठक, लेखक, विज्ञापनदाता, सहयोगी एवं शुभेच्छुक सबैमा हार्दिक शुभकामना व्यक्त गर्दछु।

डिजिटल मिडियाको इतिहासमा दुई वर्षको अवधि केही पनि होइन। तर, यो दुई वर्षमा एउटा संस्था जन्माएर त्यसको पहिचान स्थापना गर्नु सजिलो कुरा पनि होइन।

हाम्रा प्रिय पाठक र पत्रकारहरुको अमूल्य योगदानबाट हामीले बेग्लै पहिचान स्थापना गर्न सफल भएका छौं। यही पहिचानका कारण हामीमाथि नागरिकलाई थप सुसूचित बनाउन दायित्व थपिएको छ। त्यसैले डिजिटल मिडियाको भिडमा हामीे अझै विशिष्टिकृत हुँदै जाने प्रयासमा छौं। हाम्रो प्रयासले आमनागरिकको जीवनस्तर, सोचाइ र समृद्धिमा योगदान पुग्नेछ भन्नेमा विश्वस्त छौं।

राजनीतिक परिवर्तनसँगै सञ्चारमाध्यमको भूमिका पनि बदलिइरहन्छ। हिजोका दिनमा आमसञ्चारमाध्यमले लोकतन्त्र प्राप्ति, राजनीतिक संक्रमणकालको अन्त्य र दिगो शान्तिका लागि वकालत गथ्र्यो। तर आजको सञ्चारमाध्यम नागरिकको अधिकार, मुलुकको सामाजिक एवम् आर्थिक विकासका मुद्दाहरुमा केन्द्रित हुनुपरेको छ। भ्रष्टाचार र अनियमितताविरुद्धको खबरदारीमा सक्रिय हुनुपरेको छ। यसका लागि सत्य, तथ्य र विश्वसनीय सूचना प्रवाह अनिवार्य हुन्छ। त्यसैले हामी निष्पक्ष पत्रकारिताप्रति निष्ठावान् छौं र रहिरहनेछौं। कसैप्रति आग्रह/पूर्वाग्रह राख्दैनौं। व्यावसायिक पत्रकारिता हाम्रो मूल मन्त्र हो।

वार्षिकोत्सवको यस अवसरमा नेपाल समय डट कम अनलाइन पोर्टल लोकतन्त्र, राष्ट्रियता, प्रेस र अभिव्यक्ति स्वतन्त्रताको वकालत गर्दै सत्य–तथ्य सूचना सम्प्रेषणमा सक्रिय रहिहरने विश्वास दिलाउन चाहन्छु।

कोरोना भाइरस महामारीले विश्वभरको आर्थिक परिवेश खल्बलिँदा त्यसको असर हाम्रो समाजमा पनि परेको छ। यसको प्रभाव कतिसम्म पर्ने हो अनिश्चित छ।

यो असहज परिस्थितिका माझ पनि चुनौतीहरुलाई पञ्छाउँदै मिडियामार्फत पाठकलाई सुसूचित गराउने काममा हामी निरन्तर लागिरहने छौं। हामी जस्तोसुकै परिस्थितिमा पनि रचनात्मक रुपमा अघि बढिरहनेछौं।

नेपाल समय मिडियाको दोस्रो वार्षिकोत्सवको यो सुखद अवसरमा आमपाठक, विज्ञापनदाता र शुभचिन्तक सबैबाट देखाउनुभएको सदाशयताको कदर गर्दछौं। भविष्यमा रचनात्मक सुझाव र सहयोगको अपेक्षासहित सबैलाई हार्दिक धन्यवाद दिन चाहन्छौं। साथै १३ औं गणतन्त्र दिवसका अवसरमा सम्पूर्ण नेपाली दिदीबहिनी दाजुभाइहरुमा हार्दिक मंगलमय शुभकामना व्यक्त गर्दछौं। धन्यवाद!

विश्वनाथ शाह
अध्यक्ष