सप्तरीमा एकै दिन थपिए ११ जना, सबै भारतबाट आएका

सप्तरीमा एकै दिन ११ जना नयाँ कोरोना संक्रमित थपिएका छन् । स्वास्थ्य तथा जनसंख्या मन्त्रालयले मंगलबार अपरान्ह सार्वजनिक गरेको विवरणअनुसार सप्तरीमा ११ जना नयाँ संक्रमित पुष्टि भएको हो ।

सप्तरीको बोदे बरसाईन र सुरुङ्गा नगरपालिका तथा बलान विहुल गाउँपालिका गरी ११ जनामा कोरोना संक्रमण पुष्टि भएको स्वास्थ्य कार्यालय सप्तरीका प्रमुख दुनियालाल यादवले जानकारी दिए ।

स्वास्थ्य प्रमुख यादवका अनुसार बोदे बरसाईनमा ८, बलान विहुलमा २ र सुरुङ्गा नगरपालिकाका एकजनामा संक्रमण देखिएको छ । मंगलबार संक्रमण पुष्टि भएका सबै ११ जना भारतबाट आएको उनले बताए । भारतमा यातायात सञ्चालन भएपछि उनीहरु सप्तरी फर्किएको यादवले जानकारी दिए । संक्रमण देखिएका उनीहरु सबैजना क्वारेन्टिनमा रहेको उनले बताए ।

सप्तरीका स्वास्थ्य प्रमुख यादवले ११ जना संक्रमित थपिएसँगै उनीहरुलाई भर्ना गर्न आइसोलेसन बेडको अभाव भएको बताए । यसअघिका ४ र मंगलबार ११ जना थपिएपछि सदरमुकाम राजविराजस्थित गजेन्द्रनारायण सिंह अस्पतालको आइसोलेसनमा समेत बेडको अभाव भएको उनले बताए ।

‘गजेन्द्रनारायण सिंह अस्पतालमा बेडको अभाव भएको छ, साई कृष्णा मेडिकल हलको आइसोलेसन तयार भएको छैन,’ उनले भने,‘थपिएका संक्रमितहरुलाई कहाँ राख्ने समस्या भएको छ ।’ मंगलबार थपिएका मध्ये एकजना महिलासमेत रहेकोले आइसोलेसनमा व्यवस्थापन गर्न कठिनाइ भइरहेको उनको भनाइ छ ।

११ जना थप भएपछि आरडीटी पोजिटभ भएर आइसोलेसनमा भर्ना भएका चारजनालाई स्वाब परीक्षणको रिपोर्ट नआउँदै नकिालिएको बताइएको छ ।

मंगलबार ११ जना थपिएसँगै सप्तरीमा संक्रमितको संख्या १५ पुगेको छ भने प्रदेश २ मा कुल संक्रमितको संख्या २७९ भएको छ ।