कोरोनाबाट करिब ५५ लाख संक्रमित, अमेरिकामा भन्दा ब्राजिलमा मृत्युदर बढी

काठमाडौं- विश्वव्यापी महामारीको रुपमा फैलिएको कोरोना भाइरसबाट करिब ५५ लाख ब्यक्ति संक्रमित भएका छन् ।

जोन हपकिन्स विश्वविद्यालयका अनुसार २ सय १३ देशमा फैलिएको कोरोना भाइरसबाट मंगलबार बिहानसम्ममा ५४ लाख ९३ हजार ४ सय ८२ जना संक्रमित भएका छन् । ३ लाख ४६ हजार २ सय ९ जनाको मृत्यु भएको छ ।

पछिल्लो २४ घण्टामा मात्रै ९० हजार १ सय २८ जना नयाँ संक्रमित थपिएका छन् भने ३ हजार ९६ जनाको मृत्यु भएको छ । सोमबार कोरोनाबाट ज्यान गुमाउने संख्या सबैभन्दा धेरै ब्राजिलमा रहेको छ।

अमेरिकालाई समेत पछि पार्दै ब्राजिलमा पछिल्लो २४ घण्टामा ८ सय ६ जनाको मृत्यु भएको छ । अमेरिकामा पछिल्लो २४ घण्टामा ५ सय ५ जनाको मृत्यु भएको छ । आइतबार पनि अमेरिकामा ६१७ जनाको मृत्यु भएको थियो भने ब्राजिलमा ७०३ जनाको मृत्यु भएको थियो ।

अमेरिकामा करीब दुई महिनापछि आइतबारदेखि मृत्यु हुनेको संख्या हजारभन्दा तल झरेको हो । त्यहाँ पहिलोपटक ३१ मार्चमा मृतकको संख्या हजार नाघ्दै एक हजार ८४ पुगेको थियो । त्यसबीचमा एक दिन १० मेमा मात्र हजारभन्दा तल ७५० जनाको मृत्यु भएको थियो ।

कोरोनाबाट हुने मृत्युदर घट्दै गएसँगै आइतबार जम्मा ६ वटा देशमा मात्रै एक सय भन्दा बढि ब्यक्तिको मृत्यु भएको छ ।

ब्राजिलमा ८ सय ६, अमेरिकामा, ५ सय ५, मेक्सिकोमा २ सय १५, भारतमा १ सय ४८, बेलायत १ सय २१ र क्यानडामा १ सय २१ जनाको मृत्यु भएको छ ।