सोती घटना : चार जना अझै बेपत्ता, मृतकका आफन्त आन्दोलित

सुर्खेत- रुकुम पश्चिमको चौरजहारी नगरपालिका–८ सोती घटनामा मृतकका आफन्त आन्दोलित भएका छन्। २ जनाकाे ज्यान जाने गरी भएकाे उक्त घटनाकाे छानबिन माग गर्दै उनीहरूले  जिल्ला प्रहरी कार्यालय जाजरकाेट अगाडि साेमबार नाराजुलुस गरेका हुन्।

घटनामा बेपत्ता भएका चार जनाकाे खाेजी गर्नुपर्ने माग उनीहरूकाे छ। सोतीकी १७ वर्षीया किशोरी र जाजरकोट भेरी नगरपालिका–४ रानागाउँका २१ वर्षीय नवराज विकबीच प्रेम विवाह गर्न खोज्दा किशोरीका आफन्तले विकका आफन्तमाथि आक्रमण गरेका थिए।

घटनापछि नवराज भेरी नदीमा मृत भेटिएका थिए। उनीसँगै सोती पुगेका र चौरजहारी नगरपालिकाका वडा नम्बर १ का टीकाराम सुनारले सोही घटनामा ज्यान गुमाएका छन्।

दुवैको शव भेरी नदी किनारमा भेटिएको थियो। घटनामा निष्पक्ष छानबि माग गर्दै मृतकका परिवारले शव बुझेका छैनन्। त्यस्तै भेरी नगरपालिका वडा नम्वर ४ का गणेश विक, ११ का लोकेन्द्र सुनार, गोविन्द शाही र सन्दीप विक अझै बेपत्ता छन्।

नवराज १८ जना साथीलाई लिएर सोती गएका थिए। १२ जना प्रहरीको नियन्त्रणमा छन्। प्रेमिकाका परिवारले नवराज आएको थाहा पाएपछि स्थानीयको सहयोगमा कुटपिट गरी भेरीमा फालिएदिएको मृतकका आफन्तले आरोप लगाउँदै आएका छन्।

घटनापछि किशोरी, उनका बुवा वीरबहादुर मल्ल, आमा प्रकाशी मल्ल र सोही वडाका वडाध्यक्ष डम्मबरबहादुर मल्लसहित ८ जनालाई प्रहरीले पक्राउ गरेको छ।

प्रारम्भिक अनुसन्धानमा छातीय विभेदका कारण घटना भएको पाइएको जिल्ला प्रहरी कार्यालय जाजरकोटका डीएसपी किशोर श्रेष्ठले बताए। उनले घटनाबारे विस्तृत अनुसन्धान भइरहेको र बेपत्ताको खोजी जारी रहेको बताएका छन्।