नारायणी अस्पतालबाट १८ जना कोरोना संक्रमित डिस्चार्ज

पर्सा जिल्लाको आइसोलेसनमा उपचाररत ७ महिलासहित १८ जना कोरोना भाइरसको संक्रमणबाट मुक्त भएर डिस्चार्ज भएका छन् ।

नारायणी अस्पतालको प्रसूति गृह भवनमा कोरोनाको उपचारमा रहेका वीरगन्ज महानगरपालिकाको वडा नम्बर ३ का कोरोना संक्रमितहरू डिस्चार्ज भएको उपचारमा संलग्न डा। उदय नारायण सिंहले बताए ।

उनका अनुसार ७ जना महिलामा ६ वर्ष, ३५ वर्ष, १३ वर्ष, २९ वर्ष, ३२ वर्ष, १३ वर्ष र ६२ वर्षका छन्। यसैगरी १०, ९, १५, ३, ६६, १०, ४०, ४३, ३७, १२ वर्षका पुरुष र ४ महिनाका बालकको रिपोर्ट पटक पटक २ पटक नेगेटिभ आएकाले डिस्चार्ज गरिएको छ।

डिस्चार्ज हुने १८ मध्ये १७ जना एकै परिवारका हुन्। उनीहरुमा वैशाख २४ गते कोरोना संक्रमण पुष्टि भएको थियो।

हाल वीरगन्जको नारायणी अस्पतालमा ४४ जना र नारायणी अस्थायी गण्डक हस्पिटलमा २५ जना गरी ६९ जना आइसोलेसन वार्डमा उपचाररत छन् ।

उपचार भइरहेका सबैको स्वास्थ्य अवस्था सामान्य रहेको अस्पतालका मेडिकल सुपरिटेन्डेन्ट डा। मदन उपाध्यायले बताए ।