कांग्रेस विशेष समितिको सुझाव : सुरक्षित लकडाउन, चलायमान अर्थतन्त्र

काठमाडाैं- नेपाली कांग्रेसको कोरोना असर र अब चाल्नुपर्ने कदमबारे अध्ययन गर्न गठित विशेष समितिले सुरक्षित लकडाउन, चलायमान अर्थतन्त्र भन्ने निष्कर्षसहितको सुझाव दिएको छ।

समितिले कोरोनाबाट लगानी, पूर्वाधार र रोजगारमा परेको र पर्न जाने असर न्यून गर्न चाल्नुपर्ने कदमबारे अध्ययन गरी पार्टीलाई यस्तो सुझाव दिएको हो।

प्रतिवेदनमा नागरिकको जीवन रक्षा, औषधि उपचार र उपकरणको व्यवस्थामा विशेष ध्यान दिनुपर्ने सुझाव दिइएको छ। विपन्न नागरिकले खाद्यान्न संकट व्यहोरिरहेकाले उनीहरुलाई दाल, चामलको विकल्पमा जीवनयापनका लागि लकडाउनभरि र लकडाउन सकिएको तीन महिनासम्म प्रतिपरिवार न्यूनतम मासिक ५ हजार उपलब्ध गराउन सुझाव दिइएको छ।

समितिले अब सुरक्षा अपनाउँदै लकडाउन खुुकुलो पार्न सुझाव दिएको छ। प्रतिवेदनमा भनिएको छ, 'बिना कुनै योजना लकडाउन बढाउँदै जाने हो भने सामाजिक द्वन्द्व बढ्ने निश्चित छ। अब आवश्यक सुरक्षा अपनाउँदै लकडाउन खुकुलो पार्नुपर्छ।' 

सुरक्षाकर्मीको तलबभत्ता बढाउन, बैंकको ब्याज तिर्ने भाका बढाउन पनि समितिले सुझाव दिएको छ। कृषि र पशुपालनका लागि बैंक, लघुवित्त र सहकारीमार्फत परिचालित १ लाख ररुपैयाँसम्मको कर्जा र त्यसमा लागेको ब्याज मिनाहा गर्नुपर्ने सुझाव समितिको छ।

समितिको प्रतिवेदनमा भनिएको छ, 'बैंक तथा वित्तीय संस्थाले ५ लाख रुपैयाँसम्मको कृषि र पशुपालन कर्जा र एक अंकको ब्याजदरमा मात्रै प्रवाह गर्न पाइने नीति ल्याउनुपर्छ।' पशुधन र कृषि बिमा गर्नुपर्ने, व्यावसायिक खेतीलाई प्रोत्साहन गर्नुपर्नेलगायतका सुझाव समितिको छ।

समितिका संयोजक विनोदकुमार चौधरीले कांग्रेस सभापति शेरबहादुर देउवालाई उक्त सुझावसहितको प्रतिवेदन बुझाएका छन्।