आजदेखि कर्णाली प्रदेशसभाको बजेट अधिवेशन

काठमाडौं--कोरोनाको त्रासबीच आगामी आर्थिक वर्षका लागि प्रदेश सरकारले ल्याउन लागेको नीति तथा कार्यक्रम र प्रि–बजेट छलफलका लागि अधिवेशन आह्वान गरिएको हो ।

अधिवेशनमा आपसी दूरी कायम हुने व्यवस्था मिलाइएको प्रदेशसभाका सचिव जिवराज बुढाथोकीले जानकारी दिए ।

दूरी कायम गर्नका लागि यसअघि दर्शकदीर्घा र सञ्चारकर्मीका लागि छुट्याइएका ४८ सिटमा समेत सांसदहरु बस्ने व्यवस्था मिलाइएको छ । बैठक कक्षमा क्लोरिन छर्किेने र सांसदहरुले सेनिटाइजर प्रयोग गरेरमात्रै हाजिरी गर्नुपर्ने व्यवस्था मिलाइएको छ ।

सचिव बुढाकोकीका अनुसार आजको बैठकमा प्रदेश प्रमुखबाट प्राप्त पत्र पढेर सुनाउने र दलका नेताले बोल्ने कार्यतालिका छ ।

बैठकमा सहभागी हुने मुख्यमन्त्री, मन्त्री, सभामुख, उपसभामुख, प्रदेशसभाका सदस्य, मर्यादापालक, ड्राइभर र संसद सचिवालयका कर्मचारी सबैले कोरोना भाइरसको परीक्षण गराइसकेका छन्।

कोरोना संक्रमणका कारण बजेट अधिवेशनमा दर्शक र सञ्चारकर्मीहरुले भिडियो कन्फ्रेन्स हलबाट अधिवेशन अवलोकन र रिपोर्टिङ गर्ने व्यवस्था मिलाइएको छ ।