एमसीसी लगायतका विषयमा छलफल गर्न नेकपा सचिवालयको बैठक

काठमाडौं-  सत्तारुढ नेकपा सचिवालयको बैठक बालुवाटारमा बसेको छ ।

संविधान संशोधनको गृहकार्य, एमसीसी, नेपालले नयाँ नक्सा जारी गरेपछिको राजनीतिक परिस्थिति, जस्ता एजेन्डामा छलफल गर्न भन्दै बैठक बसेको हो । नेकपा प्रवक्ता नारायणकाजी श्रेष्ठले बैठक अनौपचारिक भएको जानकारी दिएका छन्।

१५ जेठमा आउने आगामी वर्षको बजेट तयारीका सम्बन्धमा पनि बैठकमा छलफल हुने बुझिएको छ ।

सचिवालय बैठक बस्नु अगाडि सचिवालयका नेताहरुले स्थायी समिति सदस्य भीम रावल, परराष्ट्र मन्त्री प्रदीप ज्ञवाली, अर्थमन्त्री युवराज खतिवडा, एमसीसी नेपालका कार्यकारी निर्देशक खड्कबहादुर बिष्टलाई भेटेका थिए।

नेकपाले वरिष्ठ नेता झलनाथ खनालको संयोजकत्वमा एमसीसी अध्ययनका लागि कार्यदल बनाएको थियो।

प्रधानमन्त्री केपी शर्मा ओलीले जेठ ६ गते संसद्‌मा सम्बोधन गर्दा एमसीसी पारित गर्ने/नगर्ने संसद्को जिम्मा भएको बताएका थिए ।

संसद्‌मा नीति तथा कार्यक्रमको २११ नं. बुँदा लप्सिफेदी–रातमाटे–हेटौँडा, लप्सिफेदी–रातमाटे–दमौली–बुटवलको ट्रान्समिसन लाइन बनाउने विषयलाई एमसीसी पछाडिको ढोकाबाट ल्याउन खोजेको भन्दै नेकपामा विरोध भएको छ ।

पार्टीको अध्ययन कार्यदलले यथास्थितिमा एमसीसी संसद्‌बाट अनुमोदन गर्न नहुने बताएको छ । तर, प्रधानमन्त्री ओली जतिसक्दो चाँडो एमसीसी संसद्‍बाट अनुमोदनको पक्षमा छन्।

बालुवाटारमै बसेेको भए पनि आजको बैठकमा प्रधानमन्त्री ओली सहभागी भएनन्।