बाँकेका २१ संक्रमितको रिपोर्ट नेगेटिभ

नेपालगन्ज- बाँकेका २१ जना कोरोना भाइरस (कोभिड-१९) संक्रमितको रिपोर्ट नेगेटिभ देखिएको छ।

स्वास्थ्य कार्यालयका कोभिड १९ फोकल पर्सन नरेश श्रेष्ठले  बाँकेका पहिलो संक्रमित ६० वर्षीय पुरुषको तेस्रो पटकको र अन्य २० जनाको दोस्रो पटकको रिपोर्ट नेगेटिभ देखिएको जानकारी दिए। उनका अनुसार पहिलो संक्रमितको भने दोस्रो पटकको परीक्षण रिपोर्ट पोजेटिभ देखिएको थियो।

बाँकेको खजुरास्थित सुशील कोइराला प्रखर क्यान्सर अस्पतालको आइसोलेसनमा उपचार गराइरहेका उनीहरुको भेरी अस्पतालको प्रयोगशालामा कोरोना परीक्षण गरिएको थियो।

उक्त आइसोलेसनमा २५ जना संक्रमित रहे पनि बाँकी ४ जनाको समयावधि नपुगेकाले दोस्रो परीक्षण नगरिएको स्वास्थ्य कार्यालयले जनाएको छ।

संक्रमितको रिपोर्ट नेगेटिभ देखिएपछि उनीहरुलाई घर पठाउने सम्बन्धमा छलफल भइरहेको फोकल पर्सन श्रेष्ठले जानकारी दिए।

बाँकेमा गत वैशाख १९ पहिलो पटक संक्रमण पुष्टि भएको थियो। हाल त्यहाँ १०१ जनामा संक्रमण पुष्टि भएको छ।