कोरोना संक्रमितलाई स्कुलमै राखियो, नगरपालिकाको आपत्ति

सुर्खेत–आठबीस नगरपालिका दैलेखका ३५ वर्षीय कोरोना संक्रमति युवालाई कर्णाली प्रदेश सरकारले उपचारबाट वञ्चित गरेको नगरपालिकाले आरोप लगाएको छ। संक्रमतिलाई तोकिएको अस्पतालमा उपचार गर्नुपर्नेमा कुनै मापदण्ड नै पूरा नभएको स्कुलमा राखिएको प्रति गम्भीर ध्यानाकर्षण भएको नगरपालिको जनाएको छ।

‘कोरोना उपचारको लागि तोकिएको अस्पतालमा नपुर्‍याइ संक्रमितलाई उपचारबाट वञ्चित गरिएको छ’, नगर उपप्रमुख दीपा बोहोराद्वारा हस्ताक्षरीत विज्ञप्तिमा भनिएको छ, ‘पूर्वाधार तयार गर्ने स्वार्थमा संक्रमतिको स्वास्थ्य माथि गरिएको गम्भीर खेलवाड हामीलाई सैह्य छैन।’

संक्रमित युवालाई कर्णाली स्वास्थ्य विज्ञान प्रतिष्ठान जुम्ला, प्रदेश अस्पताल सुर्खेत र चौरजहारी सामुदायिक अस्पताल मध्ये कुनै एक अस्पतालमा उपचार गराउनुपर्ने नगरपालिकाले जनाएको छ। कर्णाली प्रदेशका एकमात्र संक्रमित ती युवालाई दैलेख सदरमुकामस्थित सरस्वती मावि झुप्रेसालमा राखिएको छ।

यता जिल्ला जनस्वास्थ्य कार्यालय दैलेखले संक्रमितको उपचारमा अहिले नै विशेष अस्पतालमा गर्नुपर्ने अवस्था नरहेको जनाएको छ। ‘संक्रमितलाई कुनै लक्षण छैन, उनी सामान्य अवस्थामा छन्’, दैलेखका जनस्वास्थ्य प्रमुख डाक्टर निराजन पन्तले भने, ‘स्कुललाई दुई महिनाअघि नै अस्पतालका रुपमा रुपान्तरण गरेका छौं, उपचारमा विभेद गरिएको होइन।’ संक्रमतिको उपचारमा डाक्टरसहित चार जनाको टोली खटिएको उनको भनाइ छ।