चक्रवातकाे असरले हावाहुरीसहित तीन दिन वर्षा हुने

काठमाडौं- बंगालको खाडीमा बनेको अम्पोन नामक चक्रवातको असर नेपालमा देखिन थालेको छ।

चक्रवातको प्रभावका कारण आज (मंगलबा)देखि नेपालमा पनि पानी पर्न थाल्ने र पूर्वी तथा मध्य क्षेत्रमा लगातार पानी पर्ने सम्भावना रहेको मौसम पूर्वानुमान महाशाखाले जनाएको छ ।

यसको प्रभाव तीन दिनसम्म देखिन सक्नेछ भने ठाउँ ठाउँमा हावाहुरीसहित वर्षा हुने सम्भावना रहेको मौसमविद्हरुले बताएका छन् । पश्चिमको तुलनामा पूर्व र मध्य क्षेत्रमा यसको प्रभाव धेरै पर्ने अनुमान गरिएको छ ।

अहिले काठमाडौंसहित मध्य र पूर्वी क्षेत्रमा आकाश धुम्मिएको छ । केहि ठाउँमा हावा हुरीसहित वर्षाको हुने अनुमान गरिएको मौसमविद् गंगा नगरकोटीले जानकारी दिइन् ।

उनका अनुसार त्यस शक्तिशाली चक्रवातको बाहिरी घेराको बादल मात्र अहिले नेपाल आइरहेको छ । सोहि कारण आज बिहानै काठमाडौंलगायत आसापासका क्षेत्रमा वर्षा भएको हो।

यसको असर बिस्तारै बढ्दै जाने उनले बताइन् । मौसमविद् नगरकोटीले भनिन्- 'यसको प्रभाव आजभन्दा भोलि बढ्दै जान्छ, मध्य र पूर्वी क्षेत्रका केही स्थानमा हावाहुरीसमेत आउने सम्भावना देखिएको छ ।' 

यस्ताे हुनेछ आगामी तीन दिनकाे माैसम

जेठ ६ गते (मंगलबार)

दिउँसोः देशको पूर्व र मध्य भू-भागमा आंशिक देखि सामान्य बदली रही पश्चिमी भू-भागका केही स्थानहरुमा आंशिक बदली रहनेछ।मध्य तथा पूर्वी भू-भागका थोरै स्थानमा मेघगर्जन सहित हल्का वर्षाको सम्भावना रहेको छ।

राति: देशको पूर्व र मध्य भू-भागमा आंशिक देखि सामान्य बदली रही पश्चिमी भू-भागका केही स्थानहरुमा आंशिक बदली र बाँकी भू-भागमा मौसम सामान्यतया सफा रहनेछ। मध्य तथा पूर्वी भू-भागका थोरै स्थानमा मेघगर्जन सहित हल्का वर्षाको सम्भावना रहेको छ।

जेठ ७ गते (बुधबार)

दिउँसोः देशको मध्य तथा पूर्वी भू-भागहरुमा सामान्य बदली रही पश्चिमी भू-भागका केही स्थानहरुमा आंशिक बदली रहनेछ।मध्य तथा पूर्वी भू-भागका केही स्थानहरुमा मेघगर्जन सहित हल्का वर्षाको सम्भावना रहेको छ।

राति: देशको मध्य तथा पूर्वी भू-भागहरुमा सामान्य बदली रही बाँकी भू-भागमा मौसम सामान्यतया सफा रहनेछ। मध्य तथा पूर्वी भू-भागका केही र पश्चिमका थोरै स्थानहरुमा मेघगर्जन सहित हल्का वर्षाको सम्भावना रहेको छ।

जेठ ८ गते (बिहीबार)

दिउँसोः देशको मध्य तथा पूर्वी भू-भागहरुमा पूर्ण बदली रही पश्चिम भू-भागहरुमा सामान्य बदली रहनेछ। मध्य तथा पूर्वी भू-भागका केही र पश्चिमका थोरै स्थानहरुमा मेघगर्जन सहित हल्का देखि मध्यम वर्षाको सम्भावना रहेको छ।

राति: देशको मध्य तथा पूर्वी भू-भागहरुमा पूर्ण बदली रही पश्चिम भू-भागहरुमा सामान्य बदली रहनेछ।मध्य तथा पूर्वी भू-भागका केही र पश्चिमका थोरै स्थानहरुमा मेघगर्जन सहित हल्का देखि मध्यम वर्षाको सम्भावना रहेको छ।