सैन्य पोसाकमा हिँड्ने युवक नियन्त्रणमा, राजधानीका चार ठाउँमा सेनाकाे निगरानी

काठमाडौं– लकडाउनमा नेपाली सेनाको पोसाक लगाएर सवारी चलाउने एक युवकलाई सेनाले नियन्त्रणमा लिएको छ।

सेनाको पोसाक लगाएर मोटरसाइकल चलाउँदै गरेका बाँसबारी बस्ने २९ वर्षीय सुशील खड्कालाई सेनाले नियन्त्रणमा लिएको हो।

बाँसबारीमा राजु कोल्डस्टोर नामको होटलका सञ्चालक खड्कालाई सैनिक प्रहरीले महाराजगन्जबाट नियन्त्रणमा लिएको सेनाका प्रवक्ता विज्ञानदेव पाण्डेयले जानकारी दिए।

प्रहरीले चेक नगरोस् भनेर खड्काले सधैँ सैनिक पोसाक लगाएर आवतजावत गर्दै आएको खुलेको पाण्डेयले बताए।

“उनले सैनिक पोसाक दुरुपयोग गरेका छन्। अब हामी छानविन गर्छौं,” पाण्डेयले नेपाल समयसँग भने, “सरकारले ६ महिनापहिले नै सर्वासाधारणलाई सैनिक पोसाक प्रयोग नगर्न सूचना जारी गरेको थियो।”

उनले सैनिक पोसाक कताबाट ल्याए भन्ने छानविन गरेर कारबाहीका लागि नेपाल प्रहरीको जिम्मा लगाउने बताए।

सर्वसाधारणले नेपाली सेनाको पोसाक लगाएर सवारी चलाउन थालेको पाइएपछि राजधानीका चार स्थान (बानेश्वर, महारागन्ज, कालीमाटी र थापाथली) मा सैनिक प्रहरीले चेकिङ सुरु गरेको छ।

प्रवक्ता पाण्डेयले आइतबारबाट चार स्थानमा सैनिक प्रहरीले सैनिक पोसाक लगाएर आउनेलाई चेक गर्न थालिएको जानकारी दिए।

“हामीले कार्यालयभित्र काम गर्नेलाई बाहिर जान नदिने र बाहिरकोलाई भित्र प्रवेशमा रोक लगाएका छौं,” उनले भने, “बजारमा सैनिक पोशाक लगाएर सवारी चलाउनेको संख्या बढेको सुनिएपछि चेकिङ थालिएको हो।”