उदयपुरका नयाँ कोरोना संक्रमित टेलिभिजन पत्रकार

काठमाडौं- उदयपुरमा शुक्रबार कोरोना भाइरस (कोभिड-१९) को संक्रमण पुष्टि भएका २५ वर्षीय युवक पत्रकार भएको खुलेको छ।

भुल्केबाहिर पहिलो पटक कोरोना संक्रमितको रुपमा भेटिएका युवक पत्रकार भएको र उनी काठमाडौंस्थित एक टेलिभिजनको संवाददाता रहेको खुलेको छ।

जिल्ला स्वास्थ्य कार्यालय प्रमुख मोहन सुवेदीले त्रियुगा नगरपालिका घर भएका ती पत्रकारलाई कोरोना संक्रमण भेटिएपछि उपचारका लागि विराटनगर पठाइएको जानकारी दिए।

यसअघि कोरोना संक्रमण भेटिएको भुल्के क्षेत्रमा समाचार संकलनका क्रममा गएका पत्रकारलाई सोही क्षेत्रबाट कोरोना संक्रमण भएको आशंका गरिएको छ। उनको स्वाब परीक्षण धरानस्थित बीपी कोइराला स्वास्थ्य विज्ञान प्रतिष्ठानको ल्याबमा गरिएको थियो।

त्रियुगा नगरपालिका–३, भुल्केमा ३३ जनामा कोरोना देखिइसकेको छ, जसमध्ये १७ जना उपचारपछि निको भएर घर फर्किसकेका छन्।

यसअघि पर्सामा पनि दुई जना पत्रकारलाई कोरोना संक्रमण देखिएको थियो।

पर्साका सञ्चारकर्मीको कोरोना रिपोर्ट नेगेटिभ