राष्ट्र बैंकले वित्तीय संस्थामा १ अर्ब ९५ करोड लगानी गर्ने

काठमाडौं– नेपाल राष्ट्र बैंकले एक अर्ब ९५ करोड १२ लाख रुपैयाँ विभिन्न बैंक तथा वित्तीय संस्थामा एक वर्षको लागि (२०७७ वैशाख २ देखि २०७८ वैशाख १ गतेसम्म) लगानी गर्ने भएको छ । राष्ट्र बैंकले क वर्गका बैंकमा एक अर्ब ५६ करोड ११ लाख, ख वर्गमा २९ करोड र ग वर्गमा ९ करोड ७५ लाख रुपैयाँ लगानी गर्ने भएको हो ।

केन्द्रीय बैंकले सोमबार पुनः सूचना जारी गरी बुधबारसम्ममा बैंक तथा वित्तीय संस्थाले आफूले लिन चाहेको रकम र दिने व्याजदर स्पष्ट रुपमा उल्लेख गरी राष्ट्र बैंकले तोकेको शिलबन्दी दरभाउपत्र सम्बन्धी फारम भरेर राष्ट्र बैंकमा बुझाउनु पर्ने जनाएको छ ।

यसअघि राष्ट्र बैंकले चैत १० गते लगानीको लागि सूचना जारी गरेको थियो तर लकडाउनका कारण कुनैपनि बैंक तथा वित्तीय संस्थाले आवेदन दिएका थिएनन् ।

राष्ट्र बैंकले तोकेको न्यूनतम ११ वटा शर्त पूरा गरेका बैंक तथा वित्तीय संस्थामा मात्र सो लगानी गरिने केन्द्रीय बैंकले जनाएको छ ।

रकम लिन चाहने बैंक तथा वित्तीय संस्थाको न्यूनतम पुँजीकोष राष्ट्र बैंकले तोके अनुसार कायम भएकोे हुनुपर्ने, निष्कृय कर्जा ५ प्रतिशत भन्दा कम भएको हुनुपर्ने, खुद तरल सम्पत्ति २० प्रतिशत हुनुपर्ने, शीघ्र सुधारात्मक कारबाही वा समस्याग्रस्त भएको भए फुकुवामा परेको कम्तीमा ६ महिना पूरा भएको हुनुपर्ने लगायतका शर्तहरु रहेका छन् ।