जनकपुर: नेकपा कार्यालयबाट निस्कियो राजपाको जुलस

जनकपुरधाम–  निर्वाचन आयोगले प्रकाशित गरेको निर्वाचन तालिकाअनुसार जनकपुरस्थित राष्ट्रियसभा निर्वाचन कार्यालमा आइतबार विभिन्न दलका  उम्मेदवारहरु र्‍यालीसहित मनोनयन दर्ता गराएका छन्।

त्यस क्रममा जनकपुरमा राजपाले नेकपाको कार्यालयबाट र्‍याली निकालेको छ।

आगामी माघ ९ गते हुने राष्ट्रिय सभा सदस्य निर्वाचनका लागि प्रदेश २ मा नेकपा र राजपा तथा नेपाली कांग्रेस र समाजवादी पार्टीले गठबन्धन गरेका छन्।

राष्ट्रिय सभा सदस्यका लागि नेकपाबाट राधेश्याम पासवान र तुलसा दाहालले उम्मेदवारी दर्ता गराएका छन् भने राजपाबाट मृगेन्द्रसिंह यादव र शेखर सिंहको मनोनयन दर्ता भएको छ। मृगेन्द्र राजपा अध्यक्षमण्डलका संयोजक राजेन्द्र महतो र शेखर अध्यक्षमण्डल सदस्य शरतसिंह भण्डारी निकट मानिन्छन् ।

मनोनयन दर्तापूर्व राजपाका उम्मेदवार तथा नेताहरु उच्च अदालत नजिक नेकपाको कार्यालय पुगेका थिए। नेकपा कार्यालयबाट राजपा र नेकपाका उम्मदेवारसहित नेताहरु निर्वाचन कार्यालय पुगेका थिए।

मनोनयन दर्तापूर्व राजपाका महामहन्त्री तथा प्रदेश २ का भौतिक पूर्वाधार विकासमन्त्री जितेन्द्र सोनल, सामाजिक विकास मन्त्री नवलकिशोर साह, वन, उद्योग तथा पर्यटनमन्त्री रामनरेश राय यादवसहितका नेताहरु नेकपा कार्यालय पुगेका थिए ।

सञ्चारकर्मीहरुलाई संक्षिप्त प्रतिक्रिया दिँदै राजपाका उम्मेदवार शेखर सिंहले नेकपा-राजपा गठबन्धन नयाँ नरहेको बताउँदै यो सहकार्य लामो समय चल्ने दाबी गरे।

यता राष्ट्रिय सभा निर्वाचनमा सहकार्य गरेपनि कांग्रेस र समाजवादी पार्टीले भने आ-आफ्नै कार्यालयबाट र्‍याली निकालेर निर्वाचन कार्यालय पुगेका थिए। कांग्रेसले जनकपुरधाम–४ स्थित पिडडिया माइस्थानस्थित पार्टी कार्यालय र समाजवादीले आँखा अस्पतालस्थित पार्टी कार्यालयबाट जुलुस निकाल्दै मनोनयन दर्ता गर्न निर्वाचन कार्यालय पुगेको थियो ।

नेपाली कांग्रेसबाट भोला पञ्जियर र नगिनादेवी यादव तथा समाजवादीबाट रामपृृत पासवान र अनिरुद्धसिंह यादवले मनोनयन दर्ता गराएका छन् । यसअघि पनि राष्ट्रियसभा सदस्य रहेका पासवानलाई समाजवादी पार्टीले पुनः मौका दिएको छ भने अनिरुद्धसिंह राजपाबाट टिकट पाएका मृगेन्द्रका भाइ हुन् ।